01 Jan 2019 02:26

inkhel

​Australian Open-ah Del Potro kan hmu dawn lo

World no.5 Juan Martin del Potro chu kum 2019 Australian Open-ah a khupa hliam a neih avangin a inlan thei dawn lo.

Kum 30 mi Del Potro hi kum 2018 October thla-a Shanghai Masters a khelh tumin a inhliam a, Australian Open a khelh theih loh phah dawn. Social media hmangin Argentine player hian Australian Open a khelh loh tur thu sawiin, “Ka hliam pawhin dam lam a pan mek a, ka lo kir hun tur ka sawi thuai ang, mahse Australia-ah erawh a ni dawn lo,” a ti.

Grand Slam vawi khat lo la tawh tu Del Potro hi inhliam a hrat angreng hle a, a ban rek chu vawi thum lai zai ni tawhin, tuna a hliam erawh a ban rek ni lovin a khup a ni thung. Kum 2018 khan Del Potro hian BNP Paribas Open title a la a, final-ah Roger Federer a hneh nghe nghe. Hemi hnu hian French Open semi-final thleng lehin, Wimbledon-ah quarter-final a lut bawka , US Open final-ah Novak Djokovic a hneh lo bawk a ni.

A ban rek chu vawi thum lai zai a nih tawh avangin Del Potro hian duh angin backhand a hmang thei lova, heti chung hian a la tha hle a, kum 2018 –a a sulhnu pawh tarlan tawh angin a zahpuiawm loh hle.

Del Potro hian Grand Slam title pakhat a kawl a, kum 2009 khan US Open-ah a champion. Kum 2009 US Open-a champion tur hian semi-final ah Rafael Nadal a hneh a, final-ah Roger Federer a hneh leh a ni.