Champion lai Novak Djokovic chu second round-ah World number 117 Denis Istomin chuan a hnawtchhuak ta tlat mai.

Denis Istomin hian darkar 4 leh minute 48 chhungin Australian Open vawi 6 lai lo champion tawh Novak hi 7-6 (10-8) 5-7 2-6 7-6 (7-5) 6-4 in a hneh a. Kum 2008 Wimbledon-a second round a paltlang zawh loh hnuah a vawi khat nan Djokovic hian Grand Slam-ah second round a paltlang zo lo leh ta a ni.

Djokovic a tlak takah chuan World number one Andy Murray chu champion tura rinkai ber a ni ta a, Britain Murray hian round 3 a thleng tawh a ni.

2016 Rio Olympics-ah khan Novak hi World number 145 Juan Martin del Potro lakah a tlawm tawh a, ranking-a 100 chunglam laka a tlawm vawi hnihna Novak hian a tawng ta a ni.

"Ka inkhelh ve tawh chinah chuan ka hun tawn san ber a la ni. A chunglam ho level-ah hian ka inhlangkai ve thei tih hi tunah chuan ka ring ve ta.

"Set thumna atang khan ka ke ka ti na a, chuti chung chuan tha takin ka khel chhunzawm a, hetianga ka khel thei hi a mak ka ti a ni," tiin Istomin chuan a sawi.

Uzbek tennis player kum 30 mi Istomin hian kum 2001 khan khan car accident-ah a ke a ti tliak a, hun rei tak a inenkawl nghe nghe a ni.

Pictures credit : Getty