​Australian Open 2017 : Serena, Nadal leh Novak an chak

18th January 2017, 04:01AM

Champion lai Novak Djokovic leh nikuma first round-a tla Rafael Nadal-te chuan Australian Open 2017 ni hnihnaah hnehna an chang a, round 2 an lut ta a ni.

Novak Djokovic chuan Spanish Verdasco chu straight set-in a hneh a. Grand Slam champion vawi 12 lo ni tawh Novak hian a title humhim turin Round 1-ah Fernando Verdasco chu 6-1 7-6 (7-4) 6-2 in a hneh a ni. World number two Djokovic hian round 2-ah Denis Istomin leh Ivan Dodig chak zawk zawk a tum ang.

Nikum-ah first round-ah a tla nulh mai, mahse Spanish tennis star Rafael Nadal chuan kuminah bul tha takin a tan a, German mi Florian Mayer chu 6-3 6-4 6-4 in a hneh, kum 2014 hnuah a vawi khat nan Nadal hian Grand Slam title lak leh a tum ruh hle a, second round-ah Marcos Baghdatis a hmachhawn dawn a ni.

Third seed Milos Raonic chuan 6-3 6-4 6-2 in German mi Dustin Brown a hneh a. Kum 26 mi Canadian mi, nikuma semi final lut hian second round-ah Gilles Muller leh American Taylor Fritz chak zawk zawk a tum ang.

Brisbane International champion Grigor Dimitrov chuan khawtual player Christopher O'Connell chu 7-6(2) 6-3 6-3 in a hneh a, Richard Gasquet pawhin 6-4 6-4 6-2 a Australian Blake Mott hnehin round 2 a lut bawk.

Hmeichhe lamah British mi Johanna Konta leh Heather Watson te chuan second round an lut a, vawi 6 lai Australian Open champion lo ni tawh Serena Williams chuan straight-set-in Swiss teenager Belinda Bencic a hneh a, second round a lut bawk a ni.

Kum 35 mi world number two Serena hian minute 79 chhung lekin kum 19 mi Belinda Bencic hi a hneh a, Australian Open-ah hian Serena hian Grand Slam Singles title vawi 23 na lak a tum a ni.

Pictures credit : Reuters & AP

Copyright © inkhel.com 2024. All rights reserved.