Australian Open-a vawi 4 lai champion lo ni tawh kum 35 mi Roger Federer chu Melbourne-ah a inlan leh ta a, kum 2017 Australian Open tanniah Federer hian 7-5 3-6 6-2 6-2 in Jurgen Melzer a hneh a ni.

Khup hliam avanga thla 6 ngawt a chawlh hnuah a vawi khat nan Federer chuan competitive match a khel leh ta a, darkar hnih chhung an inkhelh chhungin Federer hian ace vawi 19 a nei nghe nghe a ni. Roger hian kum 20 mi American Noah Rubin a hmachhawn leh ang.

World number four Stan Wawrinka chuan inkhel hautak takah 4-6 6-4 7-5 4-6 6-4 in Slovakia mi Martin Klizan a hneh a, Wawrinka hian second round-ah American Steve Johnson a hmachhawn dawn a ni.

World number one Andy Murray chuan fiahna a hmachhawn nghal pang mai. World number 95 Illya Marchenko a hmachhawn a, Murray hian 7-5 7-6 (7-5) 6-2 in hnehna a chang a ni.

Tenth seed Tomas Berdych chuan Luca Vanni a hneh a, Seventh seed Marin Cilic chuan World number 278 Jerzy Janowicz chu darkar thum chhungin 4-6 4-6 6-2 6-2 6-3 in a hneh bawk a. World number 12 Jo-Wilfried Tsonga chuan 6-1 6-3 6-7 (5-7) 6-2 in Brazilian Thiago Monteiro a hneh bawk a ni.

Hmeichhe lamah World number one Angelique Kerber chuan a title humhim turin bul a tan a, Rod Laver Arena-ah 6-2 5-7 6-2 in Lesia Tsurenko a hneh. World number four Simona Halep erawh a chak lo hlauh a, a khupah hliam tuarin Shelby Rogers chuan 6-3 6-1 in a hneh a ni.

Kum 2003 champion Venus Williams chuan 7-6 (7-5) 7-5 in Kateryna Kozlova a hneh bawk.