2016 Formula One Season chu tan a ni ta a, Australian GP chu a khuhhawn nan hman a ni leh dawn. Vawiin khan Melbourne-ah qualifying neih a ni a, Lewis Hamilton chuan pole atangin bul a tan dawn ta a ni.
World champion Hamilton hian a vawi 50 nan pole a chang ta a, Australia-ah hian a vawi 5 nan pole a chang ta a, Australia-a Ayrton Senna-a record (6) chu a phak teuh tawh hle a ni.
Qualifying dan thar hman a ni a, sawisel erawh a hlawh hle a, Red Bull team boss Christian Horner phei chuan "F1 hian mipuite hnenah ngaihdam dil rawh se," ti hialin a sawisel. Qualifying a hmuhnawm zawk beiseia dan thar an siam chuan nuih a ti za hle a, car thenkhat phei chu lap thum chiah an tlan nghe nghe.
Formula One neitupa Bernie Ecclestone chuan hetianga sawiselna nasa tak an tawh takah chuan he idea hi ama idea vek a nih loh thu leh intlansiak dawtleh atan ngaihtuahna an sen leh tur thu leh thalo lai thlak ngai a awm a nih chuan thlak mai pawh a ngaih tur thu a sawi bawk a ni.
Qualifying hi session thuma then a ni a, hetiang hi kalphung chu a ni.
Q1 : Minute 16 chhung neih tur a ni a, car zawng zawng chu an tlan a, minute 7 hnuah a muang ber eliminate a ni. Chequered flag vai a nih hma chu minute 1 leh 30 sec tin chuan a muang ber chu eliminate zel a ni a. Driver 7 chu Q1-ah hian eliminate an ni.
Q2 : Driver 15 la damte chuan Q2 an tlan leh a, Q2 hi minute 15 chhung neih tur a ni a. Minute 6 an tlan hnuah chuan a muang ber chu eliminate niin pit-ah luh tir zel an ni a, chequered flag vai a nih hman chuan minute 1 leh 30 sec tin chu a muang ber eliminate zel an ni. Q2-ah hian driver 7 tih tlak leh an ni.
Q3: Qulifying session 3 hi minute 14 chhung neih tur a ni a. Car 8 te chu Q3-ah hian an tlan ang. Minute 5 an tlan hnuah car tlan muang ber chu an tla zel a, chequered flag vai a nih hma chu minute 1 leh 30 sec apiangin car tlanmuang ber tih tlak zel an ni anga, a tawpah car pahnih chiah an bang tawh anga, chumite chu final minute-ah an inel anga, chuta tlan chak zawk chu pole atanga bul tan tur a ni.