Lewis Hamilton chuan Australia ram kang buaipuina leh chhawmdawlnaa hman atan $500,000 (£380,000) a hlan.

Australia ram chhim chhak lampang chu a kang nasa hle a, tun thlengin mi 26 chuan nunna an chan tawh a, chenna in 2,000 chuang zet chu a chhe tawh bawk a. Nungcha thi leh hliam an tam tawh hle a, thuneitute chuan theihtawp chhuahin hma an la chho mek a ni.

Formula One champion Lewis Hamilton chu sa pawh ei ngai lo niin, Australia rama vanduaina rapthlak tak thleng mek chu a vei hle a, nungchain an tuar nasa lutuk chu a vei thu sawiin, tanpuina pek ngei hi a duh phah a ni.

Hamilton chuan, “Australia rama nungcha vaibelchhe chuang zet mai an thi tih ka hriat hian rilru a na duh hle mai a. An thiamloh ni miah loah, tlanchhiatna tur awm miah loin an nunna an chan a, a rapthlak a ni,” a ti.

“Nungcha ka hmangaih a ni tih hi chu tlang hriat niin, mahni inveng thei lo ramsate heti taka an thi mai hi ngaihtuah hrehawm ka ti hle a. Ramsa thenkhat phei chu an mang vek ang tih hlauhawm khawp a ni,” a ti bawk.

Kum 35-a upa Hamilton chuan Instagram follower maktaduai 14 vel zet a nei a, Twitter follower maktaduai 5.6 vel a nei bawk a. A follower te hnenah hian theihtawp chhuah a, chhawmdawlna kawngah mahni theih ang tawka tan la theuh turin a chah nasa hle.

Wires Wildlife Rescue, WWF Australia leh kangthelhtute hnenah Lewis Hamilton hian a pawisa thawh chu a pe a. Renault driver Daniel Ricciardo pawhin social media kal tlangin tanpuina pawisa hi a tam thei ang berin thawh turin a lo au chhuak ve mek bawk a ni.

Infiammi chi hrang hrang pawhin tanpuina pawisa hi an lo thawh tawh bakah la khawn mek pawh an awm a, Nick Kyrgios, Shane Warne leh Neil Robertson te chu hetiang lama pen chhuak tawhte an ni.