Australia ram kang tan Federer, Nadal, Serena

08th January 2020, 08:01PM

Roger Federer, Serena Williams leh Rafael Nadal te chu Australia ram kang tuarte chhawmdawlna atan an pen chhuak dawn a, Australian Open tan hmain sum tuak nan exhibition match an khel dawn.

Nikum September thla atang khan Australia ram a kang tan a, he ram kang rapthlak tak mai vang hian mi 25 chuan nunna an chan tawh a, chenna in 1,800 chuang zet a chhe tawh bawk a ni.

Tennis Australia chuan Australian Open khelh tan hmain kangmei tuar chhawmdawlna tur sum tuak nan exhibition match neih a nih tur thu an puang a. Australian Open khelh huna centre court tur, Melbourne khawpuia Rod Laver Arena-ah exhibition match hi an buatsaih dawn a, January 15 hian khelh tur a ni ang.

Exhibition match ah hian Roger Federer, Serena Williams leh Rafael Nadal te chu a langsar zual tur an ni a. Anni bakah hian Naomi Osaka, Caroline Wozniacki, Nick Kyrgios leh Stefanos Tsitsipas te pawhin an tel tur thu an ti chiang tawh bawk.

Craig Tiley, Tennis Australia chief chuan, “Darkar hnih leh a chanve chhung vel chu tennis danglam tak mai kan khel dawn a. Australia rama kangmei chhuak vanga harsatna tawkte chhawmdawlna kawnga hma la turin kan insuihkhawm dawn a ni,” a ti.

Australia rama chhiatna thleng mek vang hian infiammi chi hrang hrang chu an pen chhuak tawh a, sum an tuak ve nual tawh a. Tennis thuneitute chuan ace apianga Aus$100 dah tura hma an lakah tun thlengin Aus$1.2 million (US$820,000) zet chu a tling ve tawh a ni.

Copyright © inkhel.com 2024. All rights reserved.