India leh Australia te chuan Adelaide khawpuiah Test an khel tan a, India chu run 31 in an chak a, 2008 hnua a vawi khatna atan Australia-ah an chak a, 1-0 in hma an hruai a. He inkhelah hian Rishabh Pant chuan chuan world record a nihrual zui a ni.

Virat Kohli chu Asian captain zingah England, Australia leh South Africa a Test khelha a team te chakpui thei hmasa ber a ni a. Rahul Dravid leh Mahendra Singh Dhoni te kha England leh South Africa a Test an khelhah chiah an chak thei a, Australia ah hian an chak thei ve ta lo a ni.

India chuan a thlengtu Australia um tur hian run 323 an siam a, Aussie team chuan theihtawp chhuahin chak tum viau mahse run 291 an siam tling thei hram a. Ravidhandran Ashwin chuan Australia team tana ding hnuhnung ber Josh Hazlewood chu a vawm chhuak a, wicket 3 lain run 92 a pe chhuak a ni.

Wicketkeeper Rishabh Pant chuan Test bika record awm mek chu a nihrual a, England wicketkeeper Jack Russell leh South Africa wicketkeeper AB de Villiers te record chelh lai, catch 11 chu a nihrual ve ta a. Hetiang zat catch a neih hian Indian player zinga Wriddhiman Saha record siam, catch 10 chu a khum ta bawk a ni.

India hi Australia ramah hian Test series-ah an la chak miah lo a, mahse tun tumah hian Australia team-ah Steve Smith leh David Warner te chu an tel thei lo a, Virat Kohli pawlte tan chak theihna hun remchang a inhawng thei dawn niin a lang ve thei a ni.

Zirtawpni hian Perth ah a vawi hnihna atan an khel leh dawn a, chumi hnuah Melbourne leh Sydney ah te an khel zui leh dawn a ni.