"Mangțha u Cantona leh Man Utd. Title 18 in lak ve hunah kan intawng leh dawn nia." He thu (Liverpool fans te banner siam) hi Red Devils thinlungah chuan thu luangkuai leh thin khei tak a ni. Manchester United fans tan chuan hriat loh emaw theihnghilh theih rual a ni lo.
Sir Alex Fergusson hnuaiah Man Utd chu a vawi khat nan English Premier League ah 1992-93 season ah Champion. A hma kum lawk hian Sir Alex hian striker țha a mamawh tih a hria a, Alan Shearer lei a tum a, mahse Blackburn Rovers in an chan khalh a ni (hetih hunlai hian United aiin Blackburn hîp a na zawk kan ti thei awm e). Chutiang chu kan ni țhin. Shearer a chan tak loh avangin Dion Dublin a lei phah a ni. Mahse thil theihnghilh tawh ngai loh tur a thleng tel: "Leeds United atangin Eric Cantona a la lut!"
Tichuan 1993-94 season chuan an champion leh tlat mai bawk. Season leh 1994 ah Liverpool (United hmelhma kumhlun) an hmachhawn țumin Liverpool fans te chuan Red Devils ho tana theihnghilh tawh ngai reng reng loh tur banner an lo zar hluap mai, chu banner ah chuan hei hi a inziak a ni, "Au revoir Cantona and Man. Utd. Come back when you've won 18" tih hi.
Liverpool hian hetih hunlai hian League title vawi 18 an chawi tawh (Premier League a nih hma a ni). Tuma sawi buai rual lohin English club zinga club hlawhtling ber an ni. An confi em em a, "Sir Alex-a hnuaiah hian Man Utd in trophy tlem a zawng chawi leh pawh ni se keini pawhin kan chawi ve leh anga, an tan min umphak ngaihna a awm lo" an ti a ni ber. Manchester United hian Sir Alex-a hnuaiah EPL vawi 13 an chawi leh ang tih an ring pha lo! Chumai a ni lo, anmahni hian EPL țan a nih atanga 2018 inkarah EPL title an chawi tawh ngai dawn reng reng lo tih an suangtuah pha lo. Ryan Giggs-an Man Utd tana a khelh hmasak ber ni atang vawiin thlengin EPL title an la chawi ta lo ngar ngar a nih chu!
Tichuan, "2008-09 Season kha season ngaihnawm a lo ni ta bawk." Hemi kum hi a ngaihnawm chhan chu Man Utd an champion chuan Liverpool record an nih rual dawn; Liverpool an champion erawh chuan Man Utd an tlansan dawn. Kum 2008 tawp a lo thlen chuan Liverpool chu League table ah a chungnung ber an ni.
Mahse Liverpool coach Rafa Benitez chu Stoke City an khelh dawnin Press Conference ah a che nawi ta. Rilru lamah a paukhauh tawk loh bakah a fingin a fim tawk lo kan ti thei ang (Sir Alex-a ropuina lanna pawh a tih theih bawk awm e). Liverpool in Stoke an draw. Boruak a danglam zo ta. Kum 2009 January thla tawp a lo her chhuah meuh chuan Manchester United chu table ah top an ni ta tlat mai, Liverpool erawh pathumna an ni. February thlaah Liverpool hian United chu 4-1 in an hneh, mahse awmzia a awm tawh lo. EPL nomawi an chawi hma zawng chu United fans (Red Devils) in match tinah,"Top of the table, and that's a fact" (Table ah kan chungnung ber, chu chu thudik a ni) an ti dual dual reng tawh mai. Manchester United chuan a vawi 18-nan English title an la ta nge nge (champion nomawi an chawi), Liverpool an nih rual ta!
Eric Cantona pawhin kum 1994 a Liverpool fans ho thusawi/banner kha a lo la theihnghilh bik lo! Liverpool fans hovin, "Title 18 in lak hnu ah i lo let leh dawn nia," ti a kum 15 bawr kalta a an ngenna chu ngaipawihin 2009-10 season a Man Utd leh Liverpool te Old Trafford a an inkhel chu a rawn en ve ta ngei reng a ni. Liverpool fans (Kop) ho ngenna chu zahawma ti ve ngang a ni ang. Man Utd in EPL title vawi 18 lak hnuah lo let leh rawh ti a an ngenna chu a rawn tihhlawhtlinsak ta a ni.
Tunah hian EPL title 20 kan kawl mek tih chu hrilh nawn kan ngai lovang chu. Liverpool erawh chuan 1989-90 season hnu ah khan English title an la la lo zui ta ngar ngar a.
(He thu ziaktu hi Manchester United fan ruhkawl, pastor Rca Jongte, tuna Stanford University, USA-a Ph.D ti lai mek a ni.)