Roger Federer chuan Halle Open final-ah Borna Coric a hneh loh avangin ATP Ranking thar berah pakhatna a ni tawh lo a, Rafael Nadal chu pakhatna a ni ve leh ta.

Swiss Maestro Federer hian Borna Coric a hneh loh vangin point 200 a hloh a, Nadal chu a chungnung berah a awm theih phah a. Federer Express hian Mercedes Cup 2018 title a la a, June 18, 2018 khan ATP World Rankings-ah pakhatna a ni a, World No. 1 hi vawi 6 ngawt a ni tawh a ni.

Tun hnai thla 6 chhungin Federer leh Nadal te hi No. 1 ni thei awm chhun an ni a, an pahnih hian pakhatna leh pahnihna an innih chhawk zak zak reng mai a. 2018 tir lamah Rafa hi kar 7 vel zet chu pakhatna a ni a, Rotterdam quarter final lutin King Roger chuan dinhmun sang ber hi a luah ve leh thung a. Hemi hnu hian Nadal chu No. 1 a ni hnem zawk a, May thla khan kar khat chhung chu Federer hi a sang zawkah a tang ve leh a. Hei tih loh chu Nadal hi pakhatnaah a awm deuh reng zawk a ni.

June 25, 2018 a Ranking chhuak tharah vawi 20 ngawt Grand Slam champion ni thei hian No. 1 dinhmun a luah chhunzawm thei ta rih lo a, a elpui kumhlun Rafael Nadal chuan a lehpel leh ta rih a ni.

King of Clay hi Roland Garros-ah a che tha hle a, French Open title vawi 11-na a la a, tuna a dinhmun sawh nghehna atan hian a pawimawh hle a. Spanish Raging Bull hian French Open title la tur hian set khat chauh a hloh a, quarter final-ah Diego Schwartzman nen an inkhelhin set hi a hloh a. Semi final-ah Del Potro a hneh a, final-ah 7th seed Austrian Dominic Thiem chu 6-4, 6-3, 6-2 in a hneh a ni.

Nadal hi Federer aiin point 50 in a sang zawk a, No. 1 dinhmunah hian kar 177-na a hmang dawn chiah a. Nadal hian point 8,770 a hmu mek a, Federer hian point 8,720 a hmu bawk a. Pathumnaah chuan kum 21-a upa German star Alexander Zverev chu point 5,755 hmuin a awm bawk.