06 Nov 2018 12:45

inkhel

​ATP Finals khel thei lo tur Nadal

Rafael Nadal chu November thlaa London-a khelh tur ATP Finals-ah a inlan thei dawn lova, a ke rek zai a ni dawn.

Nadal hian hliam vangin Paris Masters pawh a khel thei lo tawh a, world no.1 a nihna pawh Novak Djokovic-a lakah a hloh phah nghe nghe. Inhliam a hrat hle a, ATP Finals pawh a khel thei lo lehzel tur hi a uiawm hle.

ATP Finals-ah hian player riat chiah an tel thei a, kum 32 mi Nadal aiah hian American player John Isner chuan ATP Finals hi a khel dawn.

Grand Slam title vawi 17 lai lo la tawhtu Nadal chuan social media lamah ATP Finals a khelh theih loh tur thu hi sawiin, “Kumin hi ka tan chuan a chhuk chho hle a, ka khelh theih chuan tha takin ka khel a, mahse hliamin min tlakbuak ve reng bawk.

“Paris-ah khan vanduaithlak takin ka pum lam nawm loh avangin ka khel thei lo tawh a, tunah ka ke rek zai a ngai leh. Ka ke rekah hian hliam ka neihna a rei tawh a, a khat tawkin min tibuai ve renga, pum nuamlo avanga Paris ka khelh theih loh lai hi remchangah la in ka rek zai hi ka rilruk ta a ni. Season tharah erawh taksa fit tha takin ka khel thei tawh ngei ang,” a ti.

Nadal a inhnuhdawh leh tak avangin Djokovic chu kumin chhungin world no.1 a ni dawn a, a career –a a vawi nga nan world no.1 niin season a khar dawn. World no.1 ni chunga season vawi nga khar thei hi an tam lova; Roger Federer leh Jimmy Connors-te chuan hetiang record hi an nei a, Pete Sampras erawhin vawi ruk ngawt world no.1 ni chungin season a lo khar tawh a ni.