ATP Finals London-a khelhah Alexander Zverev chuan final-ah world no.1 Novak Djokovic hmachhawnin, Zverev hi straight sets-in a chak a, khawvel a barakhaih.

Mi tam zawkin kum 31 mi Djokovic hi a chak zawk ring mahse kum 21 mi Zverev a theuneu lova, a career hman mekah hnehna ropui tak a chang. Zverev hian a chak avang hian pawisa fai pound maktaduai 2 bawr vel a hawn tura ngaih a ni bawk.

Zverev chuan, “Ka lawm dan hi sawi ngaihna pawh a awm lo. Ka title lak tawhah chuan a la ropui ber a, ka khelh dante, hnehna ka chan dante kha a mak hi a ni ber a, a ropui ka ti hle,” a ti.

Djokovic leh Zverev-te hi group stage-ah an lo intum tawh a, group stage-ah hian kum 21 mi hi tlawm zawkah a tang. Mahse Zverev hian semi final lut chhovin, semi final-ah hian Roger Federer a hneh bawk a, final-ah rinkai lo zawk ni mahse world no.1 chu straight sets-in a hneh leh ta a ni.

Inkhelh zawhah Djokovic chuan Zverev hnenah, “Group stage-a i khelh aiin i khel tha zawk chiang kher mai, chak kha i phu a ni,” a ti.

Zverev hi ATP Finals pakhata Djokovic leh Federer-te hneh ve ve thei hmasa ber a ni a, kum 1990-a Andre Agassi hnuah Zverev hi final leh semi final-a seeded sang ber pahnih hneh leh thei hmasa ber a ni bawk. Kum 2008 –a Djokovic-a hnuah Zverev hi ATP Finals-a champion thei naupang ber a ni a, kum 21 leh thla ruka upa chauh a ni. Zverev hi kum 1995-a Boris Becker-a hnuah German champion leh thei hmasa ber a ni bawk a ni.

Tun hnai ATP Finals:

2017: Grigor Dimitrov beat David Goffin

2016: Andy Murray beat Novak Djokovic

2015: Novak Djokovic beat Roger Federer

2014: Novak Djokovic beat Roger Federer

2013: Novak Djokovic beat Rafael Nadal

2012: Novak Djokovic beat Roger Federer