​ATP Big title-ah Novak-a'n Roger nihrual ta

17th July 2019, 03:07AM

Kan ziak tam tawh a, kan ziah bakah internet kawng sirah in hmu hnem tawh, Grand Slam hi a nawlpui hi chuan kan hre bel a, a bak tournament dang awm hi kan bel chiang lutuk lo maithei.

Tennis-ah hian khaidiat a awm chho duah a, Grand Slam, Tour Final leh ATP Masters te hi a pawimawh zual chu an ni ber a, Top player ho ten points an hmuhna ber a ni bawk.  Ranking pek dan chungchang kan post tawh a, khami chhiara hrethiam tawh tan chuan hriatthiam a awl hle tura ngaih a ni.

Tichuan, ATP-in Big tournament tia a sawi  hi 14 (Grand Slam, Tour final, Masters) a awm a, chung tournament-a Tennis GOAT 3 te dinhmun hi ilo belchiang teh ang. ATP nomawi an chawi zat hrim hrim belhchianna a ni dawn lova, Title lian (Big title) ho kan thlur bik dawn a ni.

Federer - 54 Big titles

Grand Slam lalpa a nih thu hi chu kan bel hle a, vawi 20 champion a nih tawh thute chu tumah in hrilh nawn kan ngai tawh lo ang. Khawvela Tennis star zinga fans ngah ber Roger Federer hian Tour Final vawi 6 zet a chawi tawh a, Tour Final-ah hian a champion zing ber a, record siamtu niin vawi 6 a champion tawh. He Tour Final hi Indoor-a khelh thin niin, a thiamna zawng tak a ni.

Nimahsela harsa a tih ber nia lang erawh Clay hi a la ni reng fo. Monte Carlo leh Rome-ah te Nomawi a la chawi lova, a bi kimin a la chawi lo kan ti thei awm e. Clay hi a khel lo fova, kuminah erawh a khel ve ta, nimahsela a hlawhtling hleithei lo a ni ber. Big title la kim turin tournament 2-ah Nomawi chawi a la hmabak a, champion kim vek tumin hma a la lak zel beisei ang.

Djokovic - 54 Big Titles

Wimbledon 2019 champion hlim Djokovic hian Big title lak tam lamah Federer a rawn nih rual ta. Grand Slam-ah hian a champion vek tawh a, Tour Final-ah pawh vawi 5 a champion ve tawh nghe nghe. Federer leh Nadal te tih theih loh Masters zawng zawngah a champion vek ta bik a, nikum Cincinnati-a Federer a hneh chiah khan a bi a kim ta! Golden Masters a ni bik ta tihna a nih chu. He Master Tournament 9-a champion kim thei awmchhun niin, kumin Cincinnati-a a title a hum(defend) thei a nih ngat chuan Double Golden Masters a ni dawn, thei tak ang maw?

Nadal - 52 Big Titles

Grand Slam-a a record ropui zia te, Roland Garros-a a record ropui ziate hi chu ziah nawn kan tum tawh lo, kan bel tlang vek. Master tournament danga Clay-a a record bawn lutuk hi kan thailang lo phal lo. Monte Carlo-a vawi 11 champion thei ngat, Madrid leh Rome-ah pawh vawi 5 leh vawi 9 champion tawh a nih avangin King of Clay tih loh rual a ni lo. Nimahsela harsatna a nei ve tlat, Miami Open, Hard court (Laykold)-ah hian hnehna a la chang thei lova. A harsat zual lehna chu Indoor tournament-ah hian a ni awm e. Indoor tournament pahnih; Paris Masters leh kumtawpa khelh thin ATP Tour Final-ah te Nadal hi a la champion ve lo tlat mai a. A bi a la kim lo deuh.

Mi thenkhat chik zual deuh chuan Shanghai Masters-ah a la champion lo tiin zawhna in nei ngei ang, ni e, a la champion lo. Nimahsela Shanghai Masters awm hma-a a ai awhtu Hamburg-ah a champion tawh tlat avangin Masters 9 zinga 7-ah a champion tawh tih kan sawi thei ang. Big title la kim vek turin Tournament 3-ah champion a la ngai dawn a ni.

Mi tam tak chuan Olympic Tennis hi in rilruah a lang ang, Davis Cup-te in sawi tel chak ang. Kan ziah lan loh chhan chu ATP berin Point chhiar nan an hmang lova, Big Title zinga an chhiar si loh avangin kan tarlang lo a ni. Chutihrual erawh chuan, Olympic kher hi chu kan zep tel lo phal lova, a ropui bawk a, Olympic leh Grand Slam 4-a champion-te hi Golden Slam tih hming pu ngat a ni. Golden Slam ni thei an zinga awmchhun chu Nadal a ni tlat.

An ropui fal zia ti chiang turin hei hi zep lawk teh ang. Tennis Arsi lian tia kan sawi thin, Pete Sampras khan Big title hi 31 chiah a la a, GOAT pathum zinga hniam ber Nadal nen an inthlauhna hi 21 lai a ni tihna a nih chu. Novak emaw Roger te hian nakkum Olympic lo awm turah Gold an la ve thei a nih ngat chuan Golden Slam title an nei ve dawn. Thei tak ang maw? Chumi hun chu kan thlir thup a nih ber hi. Tennis khawvela Title lian zawng zawng, ATP Big title (14) leh Olympic, a vaiin tournament 15-a champion kim thei hi an la awm lova, tunge champion kim hmasa bera i rin? Ngaihdan sawi hun.

Tichuan, an career a zawh vek hunah tunge Grand Slam title la hnem ber ang? Tu nge World no 1 ni rei ber ang? Tu nge ATP Big title la hnem ber ang? Tu nge ATP titles (overall) la hnem ber ang? Tih te hi kan nghah fan fan hrih a ngai dawn a ni. Nang tu nge a tawpa Big title la hnem ber tura i rin?

Copyright © inkhel.com 2024. All rights reserved.