Champions League group A inkhelah Atletico Madrid chuan Wanda Metropolitano-ah Ligue 1 club AS Monaco lo mikhualin, mual neitu hian si hnih faiin hnehna an chang.

Atletico hian darkar chanve khelh hmain an goal thun tur an thun zova, Koke chu 2mins-ah thunin , Antoine Griezmann chuan 24mins-ah a thun belha, 2-0 in an chak. 82mins-ah Atletico defender Stefan Savic chu hnawhchhuah a ni bawk.

Group A inkhel dangah Bundesliga club Borussia Dortmund chuan Belgian club Club Brugge chu Westfalenstadion-ah lo mikhualin team hnihte goal awm lovin an inhnehtawk.

Group A-ah Atletico Madrid chu a chung berah awmin khelh ngaah point 12 an hlawhchhuak tawh a, Dortmund chu pahnihnaah awmin point sawm an hlawhchhuak ve tawh bawka, Atletico leh Dortmund-te hian round of 16 an khel dawn. Club Brugge chu pathumnaah awmin khelh ngaah point nga an hlawhchhuak tawh a, Europa League an khel dawn. Monaco chu an la che chhe tluang zela, point khat chiah an la hlawhchhuak a ni.