Spanish club Atletico Madrid chuan Tottenham right-back Kieran Trippier chu an duh a, lakluh an tum dawn niin English chanchinbu The Sun chuan a tarlang.

Atletico Madrid hian Trippier bakah Paris Saint-Germain right-back Thomas Meunier pawh an ngaihven reng niin tarlan tel a ni a, anni pahnih zinga pakhat zawk hi lakluh theih an inbeisei niin a lang.

Atletico Madrid mai bakah hian Italian club lian Juventus pawhin Trippier hi an duh ve ngei tih tarlan a ni a, kum 28 mi Trippier hi a phu tawk anga dawrtu an awm chuan Spurs hian an hralh hreh a rinawm lo.

Kum li kalta khan Tottenham chuan Trippier hi Burnley atangin an laluta, Kyle Walker a chhuah hnuah Trippier hi Spurs right-back rinrawl niin a che tha chho hle a, England-ah pawh hmun chang chhovin, nikum World Cup-a England in semi-final an thlen khan Trippier hi English player khel tha ber zinga mi a ni tluan.

Atletico hian kum eng emaw zat an lo kawl tawh Juanfran chu tun nipui khan an chhuah tira, right-back a chhawr tur Santiago Arias la nei tho mahse , an duhkhawp lo deuh a ni.

Trippier hi tun hnaiah a khel tha lutuk lova, a hlutna pawh tla hniam deuhin pound maktaduai 30 chho bawr vel chuan lei chhuah theih mai a nih hmel a, Juventus leh Atletico hian an inchuh dawn a ang chho hle.

Juventus pawh hian an right-back Joao Cancelo an chan dawn niin a ngaih theih a, Cancelo thlaktu atan English fullback hi an hmu tai niin a langa, Turin lamah Trippier hi season tharah Mattia De Sciglio nen hmun an inchuh lovang tih a sawi theih loh bawk a ni.