Chelsea striker goal khung harsat tak Alvaro Morata chu Chelsea lam chuan an thehchhuak ta nge nge dawn niin a langa, Madrid lamah kirin Atletico Madrid chu a zawm dawn niin Sky Italia chuan a tarlang. Chelsea hian loan-a chhuah tir lova, a nghet ngeia chhuah tir an duh nia tarlan a ni bawk a, thu chiang erawh a la awm lo na in, Atletico hian loan ni lovin a ngheta an lakluh a rinawm.

Morata hi Chelsea out-field player manto ber a ni a, kum 2017 nipui lai khan pound maktaduai 70 sengin Real Madrid atangin an lalut. Tum ang leh beisei anga a chet that tak loh em avangin a man hi a tlahniam hle tura ngaih a ni a, Sky Sports tarlan danin Chelsea no.29 hi pound maktaduai 45 man bawr vel a nih hmel.

Morata hian Madrid pan duh mahse Chelsea hian a aiawhtu an hmuh hma chu chhuah tir an remti lova, mahse Chelsea leh Juventus-te chu Gonazalo Higuain-a chungchangah inremna an nei tawh niin Sky Italia chuan a tarlanga, hemi a nih avang hian Morata pawh hian Atletico lam a pan zui ve mai a rinawm.

Goal a khung theih loh em avangin leh game-a a tangkai loh em avangin Chelsea manager Maurizio Sarri chuan Morata hi a duhsak lo chho va, duhsak hleihtheih pawh a ni lo reng a, Sarri hian Napoli lama a lo hmelhriat tawh Higuain a duh zawk tih a lang. Morata hi Chelsea game hnuhnung berah bench-ah pawh thuttir a ni lova, a inhliam chho zeuh zeuh nen Sarri-a hnuaiah a khel tlem sawt hle.

Chelsea hi tun season-ah striker hriam an neih loh avangin duh angin point an hlawhchhuak tam thei lo pawh ti ila kan sawi sual tamin a rinawm lo. Morata hian hma a sawn lo hle a, goal a khung theih loh mai bakah game-play ah a tangkai loh bawk avangin a man to hle mahse Chelsea hian tihral zai an rel ta niin a lang a ni.