UEFA Champions League Round of 16 inkhelah champion lai Liverpool chuan Anfied-ah Spanish club Atletico Madrid an lo mikhuala, Atletico hian first leg-a si khat faia an lo hneh tawh Liverpool hi second leg-ah 3-2 a hnehin aggregate-ah 4-2 in an chak.
Liverpool hi champion lai ni mahse an home chhuanvawr Anfield-ah ngei an Champions League zinkawng tihtawp sak an ni. He inkhelah hian Liverpool tan hian Georginio Wijnaldum leh Roberto Firmino te chuan goal an khunga, Atletico tan hian Marcos Llorente chuan goal hnih khungin Alvaro Morata chuan goal khat a khung bawk.
Inkhel a hmuhnawma, a tir atangin inkhel tempo a ranga, team hnihte an hmuhnawm dun hle. Liverpool hian a tir atangin first leg-a an si phurh rulh tum mahse goal an khung hleithei bik lova, Atletico lam hian an dawhtheiin, an goal an venghim tha a, a hun takah Liverpool an nawr let thin.
Atletico goalkeeper Jan Oblak a khel tha a, save tha tak tak neiin, inkhel zawhah Man of the Match-a thlan a ni nghe nghe. Liverpool erawhin an first choice keeper Alisson Becker an chhawr theih loh avangin Adrian chuan si ban a nghaka, a khel tha lem lo hle a, a tihsual avangin goal an chhuah phah leh bawk.
First half-ah Liverpool hian ball an chang tam daih zawka, chance pawh insiam thin mahse Obalak an paltlang thei lo. Half time hma lawkin Liverpool hian hma an hruaia, Wijnaldum chuan Alex Oxlade-Chamberlain a cross tha zet chu lo head sawtin goal-ah a khunga, aggregate ah 1-1 a ni chiaha away goal nei an awm lo.
Second half lamah pawh Liverpool bawk an tal na leha, mahse a aia na in Oblak a tal a ni ber. Darkar khat khelh a nih hma lawkin Oblak hian save tha tak tak neiin Atletico a chhanhim zela, khawvela keeper tha ber zinga mi a nihzia a lan tir nawn leh. Darkar khat chuang hret khelh a nihin Adrian chuan a zawnin save tha tak tak a nei ve bawk.
70mins khelh a nih hma deuhin Liverpool hian aggregate-a hmahruaina hun tha tak an neia, Andy Robertson chuan hnai set sawt atangin crossbar a tauh per. Hun pangngaiah goal luh belh awm tawh lovin 90mins chu aggregate-ah 1-1 in a tawpa, Extra Time khelh a ni.
ET a hmuhnawm hle a, minute li vel khelh a nihin Liverpool hian goal an khung; goal hmasa zawk khungtu Wijnaldum chuan mual dinglam atangin Atletico box chhungah ball a cross luta, Firmino chuan lo tauhin si ban a tauh pera, hemi rawn let hi Firmino bawk chuan goal-ah lo pet lutin 2-1-in aggregate ah Liverpool hian hma an hruai.Firmino hian tun season-ah a vawi khat nan Anfield-ah goal khung.
He inkhelah hian Atletico manager Diego Simeone-a game fin zia kan hmu leha, a game plan a fuhin, substitution a siam fu cher cher hle. Simeone hian second half tir lam khan Diego Costa la chhuakin Llorente a dah luta, Costa hi a thinrim hle. Mahse, Llorente hian ET-ah goal a khunga, Liverpool goal hnihna a luh hnu lawk hian Llorente chuan Liverpool keeper Adrian-a pass sual hmang tangkaiin box pawn atangin mawi takin goal a khunga, aggregate-ah 2-2 ni mahse Atletico hian away goal an neih avangin tlang tur an ni.
Simeone hian ET first half tawp hma lawkin Alvaro Morata a dah luta, hei pawh hi a ti fuh leh viau. ET first half a tawp hma lawkin Morata chuan an half-ah ball a changa, a chhaka awm Llorente pe lawk lovin ball hi a tlanpui zeta, a hun takah Llorente pe chho in, Llorente hian box pawn atang bawkin goal a khung leha, Liverpool beiseina a thamral tan.
ET tawp dawnah Morata chuan goal a khunga, midfield-ah Atletico hi nalh taka in pass kualin Morata chu Liverpool defence hnungah ball pek a ni a, Morata hian Liverpool box-ah ball khalh lutin a ke veilam a pet goal zuia, Liverpool tan tih theih a awm tawh lo; inkhel tihtawp niin Atletic Madrid chuan champion lai Liverpool an thehchhuak ta a ni.
Liverpool 2-3 Atletico Madrid [agg 2-4]
(Wijnaldum 43’, Firmino 94’) (Llorente 97’, 105+1’, Morata 120+1’)
Player Ratings
Liverpool: Adrian 4, Alexander-Arnold 8, Gomez 7, Van Dijk 7, Robertson 6, Henderson 7, Wijnaldum 7, Oxlade-Chamberlain 8, Mane 6, Salah 6, Firmino 6... Subs: Fabinho 6, Milner 6, Minamino 6, Origi 6.
Atletico: Oblak 9, Trippier 8, Savic 7, Felipe 7, Lodi 6, Koke 6, Thomas 8, Saul 7, Correa 5, Felix 5, Costa 5... Subs: Gimenez 7, Morata 7, Llorente 8, Vrsaljko 6.