Atletico Madrid manager Diego Simeone chuan Atletico-a a contract neih lai pawtseiin, kum 2022 thleng Madrid club hi enkawl turin rinawmna thu a thlung thar.

Simeone hi club hrang hrangin an manager a tan duh hle mahse a lo khelh tawh thinna Atletico Madrid chu chhuahsan a la tum mai lo niin a lang. Argentine manager hian kum 2011 atang khan Atletico hi a lo enkawl tawha; La Liga title pakhat, Copa del Rey pakhat, Supercopa de Espana pakhat, Europa League pahnih, UEFA Super Cup pahnihte a chawipui tawh a, kum 2014 leh kum 2016-ahte khan Atletico hi Champions League final a luh pui bawk.

Real Madrid leh Barcelona-te an elpui chungin kum 2014 khan Simeone hian Atletico hi La Liga title a lakpui thei a, kum sawm dawn hnuah a vawi khat nan Real Madrid emaw Barcelona ni lovin La Liga title an lak leh hmasak ber a ni nghe nghe.

Nikum nipui lai khan Simeone hi Arsene Wenger thlakin Arsenal enkawl tur anga sawi ni nasa hle mahse,a tak ram a thleng lova, kum 48 mi hian Arsenal nen inbiakna an neih loh thu a sawi zui. Sawilan tawh angin kum 2014 leh kum 2016 khan Atletico hian Champions League final an luta, hnehna chang zo lo ve ve in, an hmelma lian em em Real Madrid chu final pahnihah hian an hneh lo.

Tunah hian khelh 23-ah Atletico hi La Liga table-ah pathumnaah an awm mek a, an chung chiaha awm Real Madrid chu point khata pha lovin, hmahruaitu Barcelona chu point sarihin an pha lo bawk a ni.