Manchester City striker Julian Alvarez chuan inkhelhna hmun tam zawk neih a duh thu a sawi chhuah hnu lawkah, Agentina chanchinbu te chuan Alvarez hi chhuak tur angin thu an vawrh darh.

Hetiang thu a rawn irh chhuah takah chuan, club lian hrang hrang ho an rawn inlar ta nghal sup sup a, English club zingah Chelsea chuan kar leh chho atang hian Alvarez lak theih a ni dawn nge dawn lo tih an thlithlai dawn nia report a ni.

Chelsea mai bakah hian, Europe club lian dang Atletico Madrid leh PSG te pawhin Julian Alvarez hi an ngaihven ve nghal niin the Sun chuan a tarlang.

Kum 24 mi hian kum 2022 khan £14million chauhin Manchester City a zawm, City hian River Plate striker hlui hi hralh mai erawh an tum a rinawm loh.

Season hnih a puma a khelh chhungin Man City tan Alvarez hian goal 36 a khung a, Pep Guardiola chuan an attacking siksawina atan Alvarez hi a chhawr thiam hle.

Hetih lai hian player tha chuan inkhelhna hmun tam zawk an duh thin a, Erling Haaland a awm chhung chu Alvarez hi a inkhel tam thei dawn lo. Hei vang hian inkhelhna hmun tam zawk a duh a nih chuan, a chhuah mai pawh a ngai dawn niin a lang a ni.