Liverpool chuan Champions League Round of 16 inkhelah Atletico Madrid chu Wanda Metropolitano Stadium-ah si khat faiin an hneh lova, Ateltico hi Saul Niguez-a goal awmchhun hmangin an chak.

He inkhelah hian Liverpool manager Jurgen Klopp chuan an player Sadio Mane chu Atletico Madrid player-te khan an bitum bik niin a sawia, Mane chu yellow-card hmuh tir an tum niin German manager hian a sawi.

Klopp chuan, “Kan tum angin thil a thleng lova, mahse khati ang game harsa tak kha kan beisei sa a, inkhel boruak sang tak pawh kha kan beisei ang niin, inkhel tam zawk kha chuan nuam pawh ka ti. Tunah hian half time ang chauh a la ni a, second half chu kan stadium-ah kan khel dawn.

“Final third-ah kan tha tawk lova, an neih zawng zawngin an goal an venghima, an box-a an defending kha a tha hle. Heti ang result a lungawi team lakah 1-0 a kan hnufual chuan tih vak ngaihna a awm lo.

“Sadio kha an bitum bika, yellow-card hmuh tir ngei an tum. Heti angah hi chuan referee pawh an fin a ngai a, a tir 30mins chhung khan an player pathum kha an tlu a, an tluk chhan pawh ka hre lo. Tu mah puh kual ka duh lova, tunah first half a tawp chauha, chawlh rei tak kan nei dawna chu chu hman tangkai kan tum dawn,” tiin BT Sport a hrilh.