Madrid khaw club pahnih Real Madrid leh Atletico Madrid-te chu player naupang an lakluh danah Fifa dan khalha an chet avangin Fifa chuan transfer window vawi hnih chhung player thar lei thei lo turin club pahnihte hi a hrem.
Mourinho an ban hnuah Chelsea chuan tunah hian coach an zawng mek a, Guus Hiddink hian tun season chawhnu chhung bak Chelsea a enkawl dawn lo nia sawi a ni. Hei vang hian Chelsea chuan a tir atanga an ngaihven chu Atletico Madrid manager Diego Simeone hi niin English media te chuan an tarlang.
Tuna Atletico hrem an nih takah chuan Chelsea hian Simeone hi an hnaih zuah sauh nia sawi a ni a, nipui bazar lo inhawn hunah Atletico boss Diego Simeone hi Stamford Bridge lamah Chelsea hian an seng lut mai dawn nitea sawi a ni chho ta mek zel e. Chelsea hian Bayern Munich chhuahsan mai tur Pep Guardiola chu duh ve tho mahse Manchester City-in an hnaih zawk avangin chuh buai an tum lo nia sawi a ni bawk.
Hetih lai hian Chelsea chuan Atletico Madrid forward Antoine Griezmann erawh an lak theih hmel ta lo hle mai. Atletico hian hrem an nih avangin player thar nipui bazarah leh nakkum January bazarah an lei thei dawn lo. Hei vang hian an player thate chu chelh hram an tum vek dawn a, chuvang chuan Chelsea chuan Griezmann hi tun hnai maiah chuan an lak theih a rinawm lo a ni.
Hrem an nih avangin Atletico chu £620,000 chawi tir an ni a, Real Madrid pawh £250,000 chawi tir an ni bawk. Club pahnihte hian he an hremna hi khin let an tum dawn tih an sawi chiang a ni.