15 Sep 2020 08:13

bakteaJr.

Mizo tlangval

​Aston Villa-ah Grealish a nghet

Premier League club Aston Villa chuan an captain chhuak tura anga sawi Jack Grealish chu contract thar an ziahpuia, Grealish hi tun nipui bazar chhungin a chhuah a rinawm ta lo.

Grealish hian Villa-ah hian kum nga daih contract a ziak thara, club lian zawka pana tun nipui chhunga chhuak ngei tura sawi a nihna chu a thai bo ta rih a ni ber.

Kum 25 mi Grealish hi kum 8 mi chauh a nih lai atangin Aston Villa-ah hian a awm tawha, kum 2013-14 season khan Villa tana a debut a khel.

English attacking midfielder Grealish-a contract thar hian kum 2025 thleng a daiha, kar hmasa mai khan England tana a game hmasa ber chu Denmark lakah a khel.

Grealish hi captain a nih angin Villa player pawimawh ber tia chhal ngam a ni a, season liamta khan Villa tan league game 36 ngawt khelin, goal 8 a khung bawka, Championship lama tla thei dinhmunah ding mahse, a tawpah an inhamtang ta hram a ni.

Grealish hi Manchester United leh Tottenham nen sawizawm a ni nasa hle a, thla hmasa lam khan chanchinbu thenkhat chuan United nen mimal thilah an inrem tawh niin an tarlang nghe nghe a, mahse a club hmangaih tana rinawm zel a thlang ta rih a ni.