February 16, Inrinni khan National Football Championship for Santosh Trophy North East Zone Qualifying Round match hnuhnung ber Ar Lammualah Assam leh Manipur te inkhelah Assam chuan 2-1 in Manipur an hneh a, North East Zone-ah Mehalaya leh Assam te hian final round an lut ta a ni. Goal lut te hi first half leh second half-a lut an ni. Assam tan Milan Basumatary chuan goal hnih a khung a, Manipur tan Ginminthang Hangsing chuan goal khat a khung ve bawk.

10:00 PM Assam 2-1 Manipur

(Milan Basumatary (P) 57', 90+3') (Ginminthang Hangsing 42')

Inkhel tan a ni a, team pahnih te an innawr tawn zak zak hnuah Assam chuan goal thunna hun tha nei hmasa zawkin mual dinglam sir a tang a forward  Bishnu  Bordoloi ball vawr luh tha zet chu midfielder Pulung Daimary chuan a tuah thelh hnuah box chhungah forward Akrang Narzary ball pek tha zet chu Milan Basumatary chuan a tauh goal dawn nia alan laiin Manipur keeper Salam Dinakumar chuan a dan sak.

Manipur pawhin goal thunna hun nei ve bawkin box chhung chiah a tang a midfielder Konsam Phalguni Sing leh forward Khanngam Horam shot tha zet chu Assam keeper Bishal Sahu chuan a dan sak a, forward Ginminthang Hangsing chuan a hun tha a hloh ve bawk.

Goal lut awmlo in chawlh lawk an hmang dawn emaw tih hnu huntawp nan minute 3 ala awmin Manipur chuan an hun tha neih an hmang tangkai a, mual veilam sir a tang a, forward Thounaojam Hemba ball pek tha zet chu box chhunga awm Ginminthang Hangsing chuan chiang zetin an hmahruaina a khung a, Manipur chuan 1-0 a hmahruaiin chawlhlawk an hmang zui ta a ni.

Second half-ah Assam insiam tha in minute 57-ah an siphurh an sut nghal a, he goal hi penalty an hlawh chhuah chu forward Milan Basumatary chuan goal-ah a chan tir; Manipur pawhin goal thun belhna hun tha nei zuiin midfielder Wahengbam free kick tha zet chu box chhunga awm defender Naorem Dhananjoy chuan goal sirah chiah a pet Assam an him hram. Goal luh belh tawh lo in 1-1 a inhneh tawkin khelmual an chhuah san dawn emaw tih hnu injury time-ah Milan Basumatary bawk chuan an chak nem nghehna goal a khung zui leh a, Assam chuan 2-1 in hnehna an chang zui ta a ni.

(adsbygoogle = window.adsbygoogle || []).push({});