Sunil Chhetri chuan Asian team lian an hmachhawn tur chu India tan tha a tih thu sawiin, hma an sawn zel theihna atan a pawimawh thu a sawi.
January thla hian United Arab Emirates-ah India chuan Asian Cup an khel dawn a. 2011 khan Qatar-ah an lo khel tawh a, hemi hnuah hian India chuan Asian team tha pahnih an hmachhawn tawh a, Russia World Cup qualifier-ah khan Asian Top 6 a lang pha Iran nen an awm dun a ni.
India chu a vawi 4-na atan AFC Asian Cup ah hian an tel ve leh dawn a, captain Sunil Chhetri chuan India team hi a kaihruai thei dawn a. Asia khawmualpuia football thiam zual ram te nen an inkhel thei chu lawmawm a tih thu hi a sawi a ni.
Chhetri chuan, “Kan tan chuan team lian hmachhawn fo hi a pawimawh em em a, UAE, Australia, Korea Republic te hi khelhpui fo thei ila a tha. Kan thenawm hnaivaia awmte nen inkhelh hnem pawh a that rualin Asia khawmualpuia a tha ber berte nena inkhelh theih tluka tha a awm lo,” a ti.
Cricket atchilhna ram India-ah hian football chuan hmun a chang hnem thei rih lo hle a, heti chung hian FIFA ranking thar berah 97-naah an awm ve thei tawh a. FIFA World Cup-a inlan theih hun an la thlir mek zel a, tun dinhmunah chuan a la hnai lo angreng hle.
Asian Football Confederation (AFC) chuan Asian Cup khel thei tur zat tihpun an remti a, a hmaa ram 16 chauh inel thin kha ram 24 tel theihin huang an zauh ta a. Hetianga AFC in hma an lak zarah hian India pawh an tel ve leh theih phah a ni.
Sunil Chhetri chuan, “Asian Cup hnuhnung ber, Australia rama 2015 a neihah kan tel thei lo kha chu ka thin a rim a, ka hnual rawih bawk a. Hetiang tournament lianah hi chuan tel thei ve zel ila duhthusam a ni a, team lian tak tak hmaa kan din hian kan nihna dik tak hriat a awlsam zawk thin,” a ti a.
“Asia khawmualpuia team tha ber berte fuan khawmna a ni a, kan che tha thei hlauh a nih phei chuan ram dang mit kan lak ve theihna hun tha tak a ni bawk a. Eng kawngah pawh kan tan chuan a tha lampang hlir a ni ber mai,” a ti bawk.
Stephen Constantine leh a pawlte chu Group A ah an awm a, a thlengtu United Arab Emirates, Bahrain leh Thailand te nen an awmho a. Kum thar January 5 atanga February 1 thlengin AFC Asian Cup hi an khel ang.