India chuan Asian Games kal mekah an lo ta neih tawh thin kabaddi final an lut zo lo a, semi final-ah Iran an hneh lo a, bronze medal bak an hawn thei ta lo.

Kabaddi hi 1990 Asian Games atang khan he infiamna kutpuiah hian telh tan a ni a, an telh tirh atangin India chuan gold medal an la chho ziah a. Kum 4 dana India tana gold medal lakna chiang sa anga ngaih a nih laiin kuminah chuan chanchin a inthlak danglam ta a ni.

Theatre Garuda-ah Iranian team te chu a tir atangin an che tha chho hle a, India chuan chet ngaihna an hre lo hle a. 2014 khan Incheon Asian Games-ah pawh Iran hian India an chhaih buai hle a, an lehthal lek lek tawh a ni.

Asian powerhouse tia hriat ve bawk Iran hi Asian Games hnuhnung pahnihah pawh pahnihna an lo ni ve ve tawh a, kuminah hian an tan champion theihna hun tha a inher chhuak ta a ni ber a. Gold medal la tur chuan final-ah Korea an hneh a ngai dawn a, India meuh pawh an hneh theih avangin an tan chuan Korea chu an huphurhawm lo viau tura ngaih a ni.

India leh Iran inhmachhawnah hian Pro-Kabaddi League player an tel nual a, Iran lamah hian defender Fazel Atrachali leh Abozar Mighani te an awm a. India team lamah hian PKL star thenkhat - Ajay Thakur, Pardeep Narwal, Rahul Chaudhari, Deepak Niwas Hooda te an awm bawk.

A tir teah India hian 6-4 in hma an hruai a, mahse Iran chuan an lehthal vat a, a tawpah Iran hi 27-18 in an chak zui ta a ni.