05 Sep 2018 12:18

inkhel

Asian Games-a India aiawh mi chi hrang hrangte

Asian Games neih zawh takah India chu an che tha hle a, Asian Games neih tawh zawng zawnga medal an lak hnem ber tum a ni a. India aiawha Indonesia rama kalte hi mi chi hrang hrang, chawr chhuahna inang lo tak tak an ni hlawm a. Hna nei lo gold medal la thei atangin, IIT alumni leh infiammi kezungtang 12 nei thlengin an awm nawk hlawm a ni.

Swapna Barman chu chanchin nei lian pawl a ni a, India tana heptathlon a Asiad gold medal la thei hmasa ber a ni a. Kezungtang 12 nei, rickshaw puller fanu Swapna Barman hian pheikhawk bun chungchangah harsatna a tawk fo a, tuna chanchin duhawm tak a neih takah chuan nuamsa taka pheikhawk a bun theih tur an siam ve tawh a beisei hle a ni.

India hming tithatu, track and field star Manjit Singh pawhin 1982 hnua a vawi khatna atan 800m gold medal a dawng a, a awmna Haryana state-ah hna nghet a nei thei lo a, sum leh pai lamah harsatna a tawk fo a. Tuna chanchin tha tak a neih hnuah hian a harsatna zualpui chu sut kian theih a nih a beisei hle.

Kum 20-a upa Dharun Ayyasamy chuan 400m hurdles-ah silver medal a la a, a pain a thihsan hnuah a nu hlawh ringin harsa takin an awm chho a. A nu hi zirtirtu a ni a, mahse hna nghet a nih loh avangin hlawh pawh a beitham hle a, hei vang hian Dharun chuan a nu tan sorkar hna nghet a duhpui hle a ni.

Barman, Manjit leh Ayyaswamy te chuan an hming chher tumin an bei a, hetih lai hian India aiawh mi 600 chuang chuan hming an lo chher sa tawh a. Indonesia lamah ram zauh zel tumin an kal a ni ber a, bridge-a bronze medal latu - Ajay Tolani, Kiran Nadar, Bachiraju Satyanarayan leh Hema Deora te pawh inanglo tak tak an ni hlawm.

Ajay Tolani hi Switzerland company, India rama inbun hotu ber a ni a. Kiran Nadar hi HCL founder nupui niin, art collector a ni a, ama museum-a dah tur painting 5000 chuang a lei tawh a. Bachiraju Satyanarayan chu IIT Delhi alumni niin Hema Deora chu union minister hlui Murli Deora nupui a ni thung. Mixed team-ah industrialist nupa Himani leh Rajeev Khandelwal te an awm bawk a ni.

Bridge ang deuh bawkin kurash chu a vawi khatna atan an telh tan a, kurash hi central Asia lama martial arts lar tak a ni a. Pincky Balhara chuan silver medal a la a, Malapradha Jadhav chuan bronze medal a la bawk a. Kurash hi India rama hriat hlawh a la nih loh avangin heta telte hian anmahni intumchawpin an mamawh an lei a. Thenkhat tan an inthuamna tur lei hi a harsat loh laiin teenager Balhara tan chuan phurrit a tling thung.

Neb Sarai, Delhi a chawr chhuak Balhara hian Uzbekistan lama ni 20 chhung a training theih nan Rs. 2 lakh dawn chu a tuak hman a. Hetianga mi tanpuia a dawn chhan letna atan 52kg category-ah silver medal a la a. A pa, kum 42-a upa a chan thut lehnghal a, hei hi a intihtibuai tir lo a, India tan silver medal a la thei ta tho a ni.

Sailing bronze medalist pahnih - Varun Ashok Thakkar leh KC Ganapathy te chuan an zirna chawlhsanin an tuina ber sailing hi an luhchilh a. An tumruhna chu an hlawhtlinpui chho tan a, Asian Games bronze medal in bul an tan thei a ni.

Compound archery lamah pawh medal an la nual a, Rajat Chauhan chuan mipa team chu final a luhpui thei a. Infiammi dang tam tak ang bawkin hna a nei rih lo a, kum li kalta khan Incheon-ah gold medal lo la tawh mahse hna hmuh lamah chuan a chhawr phah lo hle a. Rajat hian Class 12 a paltlang hleithei lo a, vawi 5 chu a bei nawn tawh a, a la hlawhtling thei tlat lo a, hei vang hian hna zawnna lamah pawh harsatna a neih phah a. A harsatna ber hi kumin March thla khan a paltlang thei ta a, 2nd division-ah a pass a ni.

Lawng kar (rowing) lamah pawh gold medal leh bronze medal la an awm a, truck driver fapa Bhagwan Singh chu journalism lama hlawhchham a ni a, Rohit Kumar nen lightweight double sculls-ah bronze medal an la a, Bhagwan Singh hian a la thlen san ber a ni.

Palembang lamah Deepak Kumar chuan 10m air rifle final-ah silver medal a la a. Air Force lam mi hian hetiang boruak hi a la tawng ngai lo a. Navy officer hlui Sanjeev Rajput pawhin 50m rifle 3 positions silver medal a la ve bawk a. Nikum khan Sports Authority of India atangin an ban a, hna nghet a nei zui ta lo a ni.