Indian Ollympic Association (IOA) chuan Asian Games lo awm tura India ram aiawh tur mi 524 an tel tur thu an tichiang.
Kumin August 18 atanga September 2 chhungin Asian Games chu Indonesia-ah neih a ni dawn a, khawpui pahnih Jakarta leh Palembang-ah te infiamna chi hrang hrang hmangin an intihsiak ang.
India ram aiawhte chu Asian Games hnuhnung pahnih aiin an tlem zawk dawn a, infiamna peng hrang hrang 36 ah mipa 277 leh hmeichhia 247 te an tel dawn a. India telna tur infiamna peng hrang hrangte chu Archery, Athletics, Badminton, Basketball, Boxing, Bowling, Canoe-Kayak (Sprint), Canoe-Kayak (Slalom), Cycling, Equestrian, Fencing, Gymnastics, Golf, Handball, Hockey, Judo, Kabaddi, Karate, Kurash, Pencak Silat, Roller Skating, Rowing, Sailing, Sambo, Sepaktakraw, Shooting, Squash, Aquatics - Swimming, Aquatics - Diving, Tennis, Taekwondo, Triathlon, Soft Tennis, Table Tennis, Volleyball, Weightlifting, Wrestling leh Wushu te an ni.
Infiamna malah chuan athletics a tel tur an thahnem ber dawn a, mi 52 an tel ang a, hockey chu member tam lamah pahnihna a ni ang a, mi 36 an tel dawn a ni.
June thla khan IOA chuan Sports Ministry chu infiammi leh thuneitu 2370 te hming an lo thawn tawh a, hemi list hi an ennawn a, an thli fim leh a, a tawpah chuan infiammi 524 an thlang chhuak a. 2014 Incheon Asian Games a India ram aiawha tel 541 chu an pha ta lo a ni.
Kumina India ram aiawh tura thlan chhuah infiammi chu a hma aiin tlem zawk mahse infiamna peng hrang hranga an telna tur chu a hma aiin a pung thung a. A hma khan infiamna peng hrang hrang 28 a awm thin a, kumin atang chuan 36 ngawt a awm tawh dawn a. Tun hmaa an tih tel ngai loh Karate, Kurash, Pencak Silat, Roller Skating, Sambo, Sepaktakraw, Triathlon leh Soft Tennis te chu kumin atangin an telh thar dawn a ni.
Rajeev Mehta, Seretary General, IOA chuan, “India aiawha Jakarta Palembang a 18th Asian Games 2018 a tel turte chu duhsakna kan hlan a. He intihsiaknaa tel tur thlan chhuah kawngah hian Indian Olympic Association chuan hmathlir thui tak nei chungin hma a la a, 2020 Tokyo Olympics-ah pawh chhawr tlak tur ngaihtuah tel chungin India aiawh tur hi an thlang hlawm a ni,” tiin a sawi.
A hmain India aiawhte chuan medal 57 an la a, heng hi gold medal 11, silver medal 10 leh bronze medal 36 te an ni a. Kuminah chuan hei aia tam hi medal lak theih ngei an tum dawn a ni.