Nov.17-19, 2017 chhung khan Buddh International Circuit, Noida, Delhi-ah Asia khawmualpui huap intihsiak - Asia Cup of Road Racing neih a ni a, India aiawha thlan mi pali zingah Mizo rider pahnih telin Israel Lalhruaizela, Bawngkawn chuan silver medal a dawng a, K.Lalnunsanga, Electric Veng chuan bronze medal a dawng bawk.

Israel-a leh Nunsanga-te medal lak hi Bike racing-a Mizoram-in International medal a lak hmasak ber a ni.

Asia Cup neih rual hian Buddh International Circuit-ah tho Gixxer Cup final round tlan a ni a, hetah hian Malsawmdawngliana, Kanan Veng leh Lalmawipuia, Bawngkawn te'n bronze medal an dawng ve bawk.

Coimbatore lamah intlansiak round 4 neih a ni tawh a, final hi Buddh International Circuit-ah tlanin round 5 intihsiak ațangin Malsawmdawngliana chu a pumpuiah pathumna a ni a, Suzuki Lets Scooter dawngin hei hi kar kalta inrinni khan Millenium Centre, Aizawlah Company ten an hlan fel tawh a. Final round bikah hian Lalmawipuia chuan bronze medal dawngin Mizo rider-pali te'n trophy an rawn hum haw vek.

Asia Cup of Road Racing-ah Race one leh Race two a awm a, race one-ah Israel Lalhruaizela chu pahnihna a ni a, K.Lalnunsanga chu a hnung chiahah tlan thlengin pathumna a ni bawk.

He'ng medal pahnihte hi Mizoram Motorsports Association-in International medal a lak hmasak ber an ni a, a pumpuiah India chu team champion ni bawkin India chetțhat ber țum a ni.

Mizo rider-te lawmpuiin Pu C.Laltlanthanga, Secretary, MSSC chuan, " Mizoten hma kan sawn chak hle a, a bikin Association naupang tak MiMSA hmasawnna hi hmuhnawm ti takin kan thlir mek a ni." ati.

MSSC Secretary chuan, " Mizoram State Sports Council hian game inpersan leh danglam tak tak 31 zet a enkawl a, rualkhai taka hmalakpui a ngaih avangin a hautak hle rualin theihtawp erawh kan chhuah reng."

"Kan duhber chu kan infiammite hlawhtlinna a ni a, chutiang tur chuan Association hruaitute pawh Federation lama hruaitu nih phak a pawimawh a, keini office lama thawkte pawhin India ram huap pawl liana hruaitu nih phak kan tum zel bawk."

"Hlawhtling tur chuan mi tih bak kan tih a ngai a, mi tih ang kan tih ve chuan kan nih-rual ringawt dawn a, chuvangin mi pen bak kan pen a ngai a ni." tiin Mizo rider-te fuihna thu a sawi.

MiMSA team hlawhtlin lawmpuina hun hi vawiin (11/12/2017) chawhma dar 11:00 khan infiammite inpui, Mizoram State Sports Council Office-ah neih a ni a, he hun hi Pu James Lalramnghaka, AE chuan a kaihruai a, Mizo rider-te hnenah a tih thin danin MSSC chuan lawmpuina thilpek a hlan leh țheuh a ni.