Arsenal, Chelsea leh England left-back hlui Ashley Cole chuan Football a chawlhsan thu a puang ta.

Kum 38 mi Cole hian Derby County-ah a football career a hmang zo a, 2018/19 season tawpah a contract a zo a, football khelh chhunzawm tum tawh lovin coaching lam luhchilh a tum ta zawk a ni.

Arsenal atanga khawvel hmelhriat niin kum 1999 khan Arsenal-ah a debut game a khel a, Crystal Palace-ah loan-in a kal a, Chelsea, Roma, LA Galaxy leh Derby tan a khel chhunzawm ta a ni.

"Thutlukna siam harsa tak ni mahse ka boot khai a hun ve ta a, ka nunah hma thar lam hawi ka tum ta a ni," tiin Cole chuan Sky Sports a hrilh.

London khaw chhuak Cole hian England tan game 107 a khel a, FA Cup-a player hlawhtling ber pakhat niin FA Cup vawi 7 lai a chawi a ni.

Arsenal-ah Premier League title vawi 2 lain; 2003-04 Arsenal chak loh nei lova an champion tum khan Gunners player pawimawh a ni a. Kum 2006 khan Chelsea zawmin Stamford Bridge-ah League title vawi khat a chawi leh bawk.

2011-12 season khan Cole hian Chelsea-ah UCL no mawi a chawi a, hemi hnu chiah season-ah pawh Europa League no mawi a chawi leh bawk.

Kumin January thla khan Derby County zawmin hetah hian Chelsea-a a khelhpui thin Frank Lampard-a hnuaiah a khel a, Premier League-a inhlankai tumin theih tawp an chhuah a, Championship play-off final khel mahse Aston Villa an hneh zo ta lo a ni.