AS Roma chuan Paris Saint-Germain atangin Javier Pastore an lalut a, Pastore hian Serie A club-ah hian kum nga awm turin contract a ziak.

Roma hi an buai char char hle a, Pastore hi PSG atangin €24.7 million (£21.7 million/$28.2 million) in an lei a, kum 29-a upa Pastore hi kum nga chhung atan contract an ziahpui a. Hemi hma lawk hian Radja Nainggolan chu Inter Milan in €38 million (£33.5 million/$44 million) in an lei fel chiah a. Davide Santon leh Nicolo Zaniolo te chu an pahnih hian €14 million in Roma chuan an lei tel bawk a ni.

Javier Pastore hian Paris Saint-Germain chu Ligue 1 title 5 ngawt a lakpui a, mahse 2017-18 season-ah Unai Emery hnuaiah khelhna hmun a chang tlem hle a. Hetianga a inkhelh khat em avang hian Argentina World Cup squad-ah pawh a tel lo a. Hetiang hi a dinhmun a nih avangin hmun dang pan mai hi a hreh loh phah a ni.

Argentina playmaker Pastore hian France ram a pan hmain Serie A ah hian season hnih chu hun a hmang tawh a, Palermo tan khelin boruak a nei lian thei hle a. Hei vang tak hian Paris khawpui lam a pan phah a ni.

Pastore chuan, “Roma ka zawm thei hi lawmawm ka ti hle a. Italy rama ka kir leh hi nuam ka tih tawh tehreng nen, club ropui takah ka lut thei zui a, ka tan chuan a phurawm tak zet a ni,” a ti.

A sawi zelnaah, “Hetianga Roma in ka chunga rinna an nghat ngam hi lawmawm ka ti a, a rulh letna atan theihtawp chhuahin ka khel ang,” a ti bawk.

Javier Pastore hian Argentina tan vawi 29 a khel tawh a, 2010 khan Serie A Young Footballer of the Year atan an thlang a. Hemi tum hian Palermo chu Serie A ah pangana a nihpui a, Europa League khel turin a hlang chho thei a ni.

AS Roma sporting director Monchi chuan, “Javier kan lalut thei hi ka lawm a, fans te chawk phur thei tur kan mamawh kan tih laia ani kan be fel thei hi lawm loh chi a ni lo a. Sporting director ka nih chhungin player kan lalut nual tawh a, Javier hi kan lakluh zingah chuan thiamna nei tha ber a la ni,” a ti.