Mesut Ozil chuan Mikel Arteta chu fakin, player te pawhin tactic pawh an hrethiam tawh hle niin a sawi.

Arsenal playmaker Mesut Ozil chuan an boss hlui Unai Emery chu kapin, a kaihhruaina hnuaiah chuan player te chuan tactic pawh an hre mumal lo niin a sawi a. Tunah chuan Arteta hnuaiah player te chuan tactic chungchangah harsatna an nei meuh tawh lo niin a sawi bawk.

Unai Emery hnuaiah khan Ozil hian khelhna hmun a chang tam lo hle a, tunah chuan a khel hnem chho ve tan tawh a. Khelmuala an chhuah dawn pawhin a hmaa an boss ai ngawt chuan tuna an boss chuan khelh dan tur pawh a ruahman fel daih zawk tih a sawi chhuak.

Ozil chuan, “Tu te pawhin tactic chu kan hre tawh hlawm a, hre lo an awm lo ti ila a dik awm e. Player te pawh tactic-ah chuan kan chiang tawh hlawm hle a, minute 60 emaw, 70 emaw hnuah player pakhat an thlak danglam chuan a dangte chuan engtia khelh tur nge tih chu sawi nawn ngai loin kan chiang tawh mai a ni,” a ti.

“A nihna takah chuan tactic hriatna kawngah nasa takin hma kan sawn chho mek a. Mikel hi helai hmunah thla hnih vel chauh a la awm a, chuti chung chuan hmasawnna duhawm tak a awm teuh hman a ni,” a ti bawk.

A sawi zelnaah, “Tunah hi chuan hun harsa kan pal tlang mek a, eng ang takin nge kan la danglam zel dawn tih chu sawi theih a ni lo a. A nihna takah chuan a tha zawngin thil hi a inher rih lo viau mai a, kan kal dan kan her dik chhoh zel chuan nakinah Premier League club chungnung pali zingah chuan kan tel leh thei ngei ang,” a ti.

“Keimahni kan inrintawk a ngai a, kan team hi kan rin zawh a ngai bawk a, coach in ti tura min duh ang te kan tih theih zel a pawimawh hle a. Khelmualah theihtawp kan chhuah vek a ngai a, chutianga kan awm phawt chuan kan sang chho sawt sawt mai dawn a ni,” tiin Ozil chuan a sawi.