10 May 2018 01:42

inkhel

Arsene Wenger leh England

1996 khan Arsene Wenger chuan England a pan a, a hmain Japanese club a enkawl thin a, tu hriat mah a hlawh lo hle a. Heti chung hian Economics degree a nei tha a, hei vang hian a hming lemah ‘Le Professeur’ an vuah phah a. English football khawvel a rawn tidanglam teuh mai a, a thlak danglam zinga langsar zualte chu ei leh in dan mumal tak neih te, inkhelh hmaa inpuahchah dan te chu a ni.

Arsenal a enkawl hnua season puitling a hman hmasak berah double champion a nihpui a, Premier League leh FA Cup-ah Arsenal a champion pui a ni.

Arsenal a enkawl hnuah Manchester United nen an inkar boruak a tang chho thei hle a, hei hian English football khawvel a tinuam a, sawi tur a tihtam phah hle.

Wenger hian player la naupang tak tak, tha chho tur a hre thei hle a, hei hi a chhawr tangkai hle a. Mi hriat lem loh naupang deuh deuh a chher chho a, khawvel hriat hlawh khawpin a chher hriam teuh a, Robin Van Persie, Cesc Fabregas leh Freddie Ljungberg te chu a langsar pawl an ni.

Arsene Wenger-a hnuaiah football khel chu en nuam ber pawl tia sawi a ni thin a, Arsenal tantu ni kher lo pawhin an inkhel hi an nghakhlel thin hle.

2003-04 season khan Arsene Wenger-a hun hmanah chuan an thlen san ber a ni a, season tluan chhuakin hneh loh an nei lo a, hei vang hian ‘The Invincibles’ tia koh an nih phah a. Hetiang ti thei tur hian Thierry Henry, Dennis Bergkamp, Robert Pires leh Patrick Vieira te chu a thawh hlawk berte an ni.

Hemi season hnu hi chuan Arsenal boruak a dai chho ta viau a, Arsenal chu title la pha lek lekin an awm ve deuh reng a, mahse a tawp an thleng lo leh thin a. Trophy an lak theih lohna chhan bulpui chu Wenger hian an hmelma Chelsea te anga player lakluhna atan pawisa a hman ve vak duh loh vang niin an sawi thin a. Kum 19 chhung chu Premier League club chungnung pali zingah Arsenal hi an tel char char a ni.

2009 atangin Manchester City an rawn che lian chho a, Arsenal chuan an player tha chho tawhte an hralh leh thin a, hei vang hian ‘club dang chawmtu’ ti hiala sawi an nih phah a. ‘Trophy lak duh vangin’ Emmanuel Adebayor, Samir Nasri, Gael Clichy te chu Manchester City in an lei a, Robin Van Persie chu Manchester United lamah a kal a, Cesc Fabregas pawh an hmelma club Chelsea lamah a kal daih bawk a ni.

Arsenal chuan season 8 chhung zet trophy la loin hun an hmang chho a, Arsenal player hmasa te kha tawh khirh tak tak an nih laiin tun hnua an player te chu an nem ta lutuk a, hei vang hian trophy pawh an lak theih loh phah nia sawi a nasa hle a, hei hi Wenger chuan a pawm thu a sawi duh lo thung.

Arsene Wenger hi FA Cup lamah chuan a che tha hle a, Arsenal chu vawi 7 ngawt a champion pui a, ‘FA Cup Specialist’ tia sawi a nih phah nghe nghe a ni.

Wenger hian Arsenal a enkawl chhung, kum 22 chhung hian trophy 17 ngawt chu an la hman a, heng zingah hian Premier League title 3 leh FA Cup title 7 te an tel a ni.

Manager tha tehna atana an hman langsar ber, Europe khawmualpui inelnaah Wenger hian a hming a chuantir thei tlat lo mai a. A chet that ber chu 2006 khan niin, UEFA Champions League final an lut a, a chak lo zawkah an tang a ni.

Arsenal a chhuahsan hnuah pawh Arsene Wenger chu Arsenal miropui tia hriat a ni reng tawh dawn a, Arsenal manager ropui ber a ni reng tawh dawn a. Hei mai hi ni loin, English football chawikangtu langsar berte zingah sawi tel a ni ve reng tawh dawn a ni.