15 Sep 2020 05:23

inkhel

Arsenal zawm turin Luiz leh Willian te’n min thlem: Oscar

Chelsea midfielder Oscar chuan Arsenal zawm ve turin David Luiz leh Willian te chuan an thlem nasa niin a sawi.

Oscar hian Stamford Bridge-ah David Luiz leh Willian te chu a lo khelhpui tawh thin a, Blues chu vawi hnih ngawt Premier League title a lakpui hman a, 2017 ah khan Chinese club Shanghai SIPG a zawm a ni.

“David Luiz leh Willian te nen hian kan la inbe fo a. Anni pahnih hian Arsenal zawm ve turin min thlem nasa a, hetiang chungchang min sawipui tur hian min rawn be zeuh zeuh thin,” tiin Oscar chuan a sawi chhuak.

“A chang chuan keimah zawk hian ka be hmasa a, a changin anmahniin min rawn be hmasa ve bawk a. Emirates Stadium lama lut ve tur hi chuan min thlem ta fo mai,” a ti bawk.

Kum 29 tling ve tawh Oscar hian Shanghai SIPG ah kum li chhung atan contract a la nei a, chuti chung chuan inkhelh a chawlhsan hma ngeiin Europe khawmualpui lama inkhelh leh theih chu a chak thu a sawi a ni.

“Tun dinhmunah chuan Shanghai SIPG ah kum li chhung atan contract ka la nei mek a, hei vang hian duh duha chhuah ngawt theih a ni lo a. Inkhelh ka chawlhsan hma ngei hian Europe khawmualpui lama hun hman leh theih chu ka chak khawp mai,” a ti.

A sawi zelnaah, “Europe khawmualpui lamah hian kal leh dawn ta ila, ka khelh duhna tur min thlantir dawn se, Chelsea chu ka thlan hmasak ber a ni ngei dawn a. He club hi ka zinkawng zawh tawha chanchin duhawm tak tak min neihtirtu a ni,” a ti.

“Stamford Bridge lam ka pan lo a nih chuan ka naupan laia an inkhel ka en hnem pawl Serie A lama kal ka duh ang a. Italian league lamah hian Brazilian an awm ve teuh a, Inter Milan leh AC Milan te hi ka club ngainat pawl an ni,” tiin Oscar chuan a sawi bawk a ni.