02 Dec 2019 02:52

inkhel

Arsenal tana beiseiawmin Brendan Rodgers a awm

Brendan Rodgers chu Arsenal tana beiseiawm hmel deuhin a awm a, a contract neih laiah chuan sawmtu tha tak an awm a nih chuan chhuak thei turin thu a indah niin a sawi.

Arsenal chuan kar hmasaah khan manager Unai Emery an ban a, a hmun ruak luah tur hian assistant coach Freddie Ljungberg chu an ruat lailawk a. Manager pangngai tur hi an zawng zui nghal a, duh erawh an la thlang fel lo a ni.

Leicester City manager Brendan Rodgers chu Arsenal chuan manager nghet atana an hual lawk zingah a tel a. Hetiang karah hian Rodgers chuan a contract neih laiah chuan hna dang thawk tura chhuak thei turin thu a indah thu hi a sawi chhuak a ni.

Rodgers chuan, “Manager ho contract reng rengah hian eng emaw thu hi a indah tel ngei ngei thin a. Hetianga thu dah hmang hian hna dang kan thawk duh zawk a nih chuan chhuak thei dinhmunah kan ding ve thei thin a ni,” a ti.

Club dangin Brendan Rodgers hi an sawm chhuak a nih chuan Leicester City chuan a zangnadawmna £14 million vel chu an phut thei dawn a. Amaherawhchu, an tan chuan an manager chhuahtir a, pawisa dawn aiin kum 46-a upa Rodgers chelh zui zel chu a thlanawm zawk dawn a ni.

Foxes hian Brendan Rodgers hi Celtic atangin an la a, tun season chhungin an che fuh chho hle a, tun dinhmunah Premier League-ah pahnihna an ni mek a, Liverpool chiah an um pha lo a. An dinhmun hi a tla hniam ta viau a nih loh chuan season tharah UEFA Champions League an khel thei ngei dawn a ni.

Arsenal director Josh Kroenke chuan an club enkawl tura an mi duh tak chu theihtawpa an zawn tur thu sawiin, Freddie Ljungberg a awm bawk a, an tan hmanhmawh vak a ngai lo niin a sawi bawk a ni.

Ljungberg kaihhruaina hnuaia an game hmasa berah Arsenal chu Norwich nen 2-2 in an inhnehtawk a, Premier League-ah 8-na an ni mek a, palinaa awm Chelsea aiin point 7 in an hniam mek a ni.

Gunners hian an manager thar ni thei tur hian mi chi hrang hrang an melh kual a, Brendan Rodgers bakah hian Juventus boss hlui Massimiliano Allegri, Tottenham Hotspur boss hlui Mauricio Pochettino bakah Arsenal captain hlui Patrick Vieira te chu an sawi ri a ni.