03 Jun 2020 05:23

inkhel

Arsenal tan Aubameyang a tha mah mah: Carragher

Jamie Carragher chuan Pierre-Emerick Aubameyang chu Arsenal-a khel zel atan chuan a tha mah mah niin a sawi.

Pierre-Emerick Aubameyang chuan 2018 ah Arsenal a zawm a, Emirates Stadium lama a luh hnuah hian game 97 a khel tawh a, hengah hian goal 61 zet chu a thun tawh bakah, mi goal thun tur vawi 13 chu a siamsak tawh bawk a ni.

Arsenal captain hian Emirates Stadium-ah hun hman tur a nei tam tawh lo hle a, a chet that theih bawk avangin Europe khawmualpuia club langsar tak takin an beisei ve mek hlawm a ni.

Gabon striker Aubameyang hian June thla laihawlah kum 31 a tling ve tawh dawn a, trophy beisei turin Arsenal chhuahsana hmun dang pan thei dinhmunah a ding ve mek a. Arsenal chuan 2019-20 season tawp rualin thutlukna siam harsa tak an nei ngei dawn a ni.

Liverpool defender hlui Jamie Carragher chuan tunhmaa a club hlui dinhmun angah Arsenal chu an ding mek nia a hriat thu sawiin, 2014 kuma Luis Suarez-a’n Anfield chhuahsana Barcelona a zawm dawn khan an rilru a buai hle niin a sawi chhuak.

Carragher chuan, “Ka hun tawp lamah khan Liverpool chu dinhmun buaithlak deuhah an lo ding ve tawh a. Khatiang deuh chiah kha tunah hian Arsenal chuan an hmachhawn mek a, Aubameyang chungchangah pawh thutlukna siam dan an thiam mai loin ka ring,” a ti.

“Aubameyang hi chelh zui zel thei ta se, season tharah hian UEFA Champions League an khel pha kher ang em? Mikel Arteta chu ni ila thutlukna mumal tak siam turin ngaihtuahna ka seng ngei ang,” a ti bawk.

A sawi zelnaah, “A nihna takah chuan Aubameyang hi Arsenal vela khel atan chuan a tha mah mah a. Hmanah Liverpool pawh hetiang dinhmunah hian kan lo ding tawh a, Luis Suarez bakah player eng emaw zat kha chelh zui zel duh viau mah ila an that em avangin hmun dangah an kal phah tawh a ni,” a ti.

“Amah ber hian hmun danga kal a duh a nih chuan kaltir mai a fuh berin ka ring a. Player tha tak, goal khung thei deuh mai hi duh duha hmu fuh theih a ni lo a, Arsenal tan chuan a chungnung pali zinga awm theihna turin hralh chhuah loh chu a fuh ber chuan ka ring,” a ti a ni.

Premier League season kal mekah Arsenal chu 9-naah an awm a, palinaa awm Chelsea aiin point 8 in an hniam rih a ni.