Unai Emery chuan season thar atan Arsenal player te siksawi nual a tum a, hralh atana chhawp chhuah zingah Shkodran Mustafi chu a langsar hle.
Arsenal club thuneitute chuan nipui transfer window inhawn hunah manager Unai Emery hnenah sum tam tham tak an pek theih loh tur thu an sawi tawh a. A hmaa an sawi dan chuan player leina atan hian club chuan £45 million vel chiah an theh chhuak thei dawn a ni.
Arsene Wenger hnuaia season liam taa season tluana point an hmuh ai khan tuna Emery hnuaia an khelh tawh chinah point 3 in an hmu hnem tawh zawk a. Heti chung hian Emery chu a duhthu a la sam lo hle a, season thar atan tun aia tha zawka inrem theih hi a duh a ni.
Sum hman tur a neih tam dawn loh avang hian Unai Emery pawhin player leina hnianghnar zawk a neih theihna atan a player neih sa chu hralh then a rilruk mek a. Hralh chhuah tura dah hran zingah Shkodran Mustafi hming chu a langsar hmasa ber a, Pathiannia Crystal Palace an hneh loh tuma a khelh dan an hmuh hnuah phei chuan hralh ngei ngei an duh phah hle.
2016 khan Arsenal chuan Valencia atangin Mustafi hi £35 million velin an lei a, tun hnai season hnih chhung chu hralh chhuah an phal tawh a; mahse, lei duhtu an la awm lo zel a. Tun season-ah a che tha lo hle a, heti a nih phei chuan German defender hi tu vakin an beisei a rinawm lo hle a ni.
Hralh chhuah tura rin kai zingah Mesut Ozil leh Henrikh Mkhitaryan te hming pawh a ri ring hle a. Arsenal chuan season tharah UEFA Champions League an khel thei dawn lo a nih chuan an player te hlawh tihhniam an tum hle a. An player zinga hlawh hnem ber Mesut Ozil chu hralh ngei a tul hle dawn a, German midfielder hian kar khatah £350,000 a hlawh mek a. Armenian star Mkhitaryan pawhin kar tin £180,000 a hlawh a, Arsenal chuan hralhna zawn kual an tum viau bawk a ni.
Gunners chuan Carl Jenkinson leh Mohamed Elneny te pawh hralh chhuah atan an rilruk mek a, anni bakah hian Calum Chambers leh David Ospina te pawh hralh hmabak an la ni a. Calum Chambers hi loan-in Fulham chuan an la mek a, David Ospina pawhin loan bawkin Napoli a zawm mek a, Arsenal lama an kir leh hunah hralh chhuah an nih a rinawm.
Petr Cech leh Aaron Ramsey te an awm loh hunah chuan player hlawh atana an phawrh thin atangin £200,000 vel bawr chu an dah tha thei dawn a. Kar khata £80,000 hlawh mek Danny Welbeck pawhin tun nipui hunah hian a contract a hmang zo ang a, hmun dang a pan a rinawm tawh bawk a ni.