Giannis Antetokounmpo chuan basketball huanga a luh hmain football a khelh thin thu sawiin, a naupan lai atangin Arsenal chu a tan ber thu a sawi.

Milwaukee Bucks forward Giannis Antetokounmpo hi NBA huangah chuan tunlaia langsar berte zinga mi a ni mek a, 2019 MVP award a lak bakah season li chhung chu All-Star team ah a tel tawh a, 2020 All-Star captain atan an ruat leh chiah bawk a ni.

Kum 25-a upa Greek basketball player hian a naupan lai chuan football a khel nasa thin hle a, infiamnaah chuan nuam a tih ber a ni thin a. A pa pawh football khel thin niin, a pa tih thin ang chu a ti chho ve viau hman niin a sawi.

Antetokounmpo chuan, “Ka naupan lai khan football hi ka ngaina a, khelh nuam ka tih ber pawh a ni thin a, khatiang lai khan Arsenal hi ka tan ber a ni thin. Ka pa khan football chu a khel thin a, kei pawhin kum 9 ka nih atanga kum 12 ka nih vel thlengin football chu ka khel ve thin a, kum 12 leh a chanve vel ka nihin basketball hi ka khel tan a ni,” a ti.

Khawvel hmun hrang hrangah Giannis Antetokounmpo hian football stadium a tlawh ve nual tawh a, hetiang hun a tawng thei hi lawmawm a tih thu sawiin, Zlatan Ibrahimovic a ngaihsan thu a sawi nasa hle a. Paris Saint-Germain hmunhma a tlawh kual tawh mai bakah ama hming chuanna jersey pawh an lo pe tawh a ni.

“FIFA ka khelh apiang hian PSG hi ka hmang ziah a, Zlatan Ibrahimovic ngaisang em emtu ka ni a, he club tana a khelh thin avang khan ka la hmang chho zel a ni,” tiin Giannis Antetokounmpo chuan a sawi.

“Kum nga kaltaah khan Chelsea ho stadium Stamford Bridge ka tlawh thei hlauh mai a, a hnuah PSG stadium Parc des Princes kan tlawh dawn tih an sawi leh a, kal ka tum nghet nghal hle a. Kan kal fuh hle a, player thenkhat ka tawng thei a, Neymar leh Kylian Mbappe te bakah a dangte nen kan intawng hlauh a ni,” a ti bawk.

PSG player Neymar leh Mbappe te chuan Paris khawpuia NBA regular-season game chu a hmunah an lo en ve thung a ni.