Harry Redknapp chuan Arsenal leh Manchester United te chu season tawpah Premier League club chungnung pali zinga an tel a rin loh thu a sawi.

Season liam taah khan Arsenal leh Manchester United te chuan UEFA Champions League an khel pha lo chiah chiah a, Arsenal chu pangana niin, United chu parukna an ni a, an pahnih hian tun season-ah Europa League lamah an inlan a ni.

Tuna season kal mekah Arsenal chu paruknaah an awm mek a, palinaa awm Manchester City aiin point 8 in an hniam a, Manchester United chu pasarihnaah awmin Gunners ai hian point 1 in an la hniam ve leh chhawng a ni.

Tottenham Hotspur chu 14-naah an awm mek a, hetiang dinhmun karah hian Chelsea leh Leicester City te chu dinhmun thaah an awm theih a rin thu Harry Redknapp chuan a sawi a ni.

Redknapp chuan, “Tottenham hian tun season chhungin a sang zual pali zingah tel ngei tum se. An tan chuan thil lawmawm ve thei tur pakhat a awm a, Arsenal hi an che fuh lo tluang hle a, hemi karah hian an rawn san chhoh theih a tul a ni,” a ti.

“Chelsea hi chu an che tha chho rih viau a, a sang pali zingah hian an tel theih mai a beiseiawm a. Chutiang bawkin Leicester City pawh hi an che chhe chho viau te a nih ngawt loh chuan a chungnung zual pali zinga tel thei tur hian an rinawm ve thei tho,” a ti bawk.

A sawi zelnaah, “Spurs hi tun season kal mekah beisei angin an awm rih lo hle a, a nihna takah chuan season tan hma khan Manchester City leh Liverpool te nen title an inchuh ho theih ka ring a, rin angin thil a kal rih lo chu a ni,” a ti.

“A buaithlak ve thin bawk a. Season liam taah khan an che fuh em em a, khatiang kha tunah chuan an ni thei tawh rih lo a. An manager Mauricio Pochettino hi ka ngaisang hle a, an che fuh ve tan tawh turah ka ngai,” a ti.

Spurs manager hlui Harry Redknapp chuan midfielder Dele Alli chu an club dinhmun siam tha thei tura a beisei thu sawiin, season tawpah chuan Tottenham chu UEFA Champions League khel thei tura an lawn chhoh leh theih ngei a rin thu a sawi a ni.