16 Oct 2020 07:48

bakteaJr.

Mizo tlangval

​Arsenal lakah De Bruyne a khel thei dawn lo

Manchester City chuan tunkar tawp hian inkhel pawimawh tak an khel dawna, Arsenal lo mikhual dawnin, an player pawimawh Kevin de Bruyne an chhawr thei dawn lo.

Sunday liamta khan UEFA Nations League inkhelah Belgium chuan England an hneh lova, hetah hian Belgian playmaker De Bruyne hi lak chhuah a ni a, Belgium manager Roberto Martinez chuan fimkhur thil thua De Bruyne chu la chhuak a nih thu a sawi.

Martinez hian fimkhur thil thua De Bruyne la chhuak a nih thu sawi mahse, De Bruyne hi a inhliama, Arsenal lakah a inlan ve thei dawn lova, a hliam erawh serious lutuk lo tura ngaih a ni.

City manager Pep Guardiola chuan Arsenal lakah De Bruyne inkhel theih loh tur hi sawiin, “A serious lutuk lo chuan ka hria a, mahse kan game khelh leh turah hi chuan a khelh a rinawm loh,” a ti.

De Bruyne hi City lamah a kir nghala, Nilaini khan Iceland lakah pawh a inlan tawh lo. Guardiola chuan sawi zelin, “International break hi ka sawisel ve ngai lova, player te tana a pawimawhzia ka hriaa, am tan khelh hi a hlu. Player te hi dam taka an rawn kir leh chu kan duh ngei thina, inhliam lo se pawh kan ti a, mahse engkim hi a ven vek theih loh a ni,” a ti.

Manchester City hian bul an tan tha lova, Premier League game thum khel tawhin, point li chiah an hlawhchhuaka, 14-naah an awm mek a ni.