​Arsenal kha goal kan khung sak - Mourinho

06th December 2018, 09:12PM

Manchester United chuan Old Trafford-ah Arsenal lo mikhualin, team hnihte chak zawk awm lovin 2-2- in an inhnehtawk a, United manager Jose Mourinho chuan an khelh that thu sawi mahse, anmahni bawk an inti chhia niin a sawia, Arsenal goal hnihte chu an khung angin a sawi tel bawk.

Mourinho chuan, “An season tha ber hmang mek team kan hmachhawn a, anmahni tawka an that ber laiin kan hmachhawna, keini erawh buaina hrang hrang kan ngah hle. Chuti chung chuang kan khelh that ve pawhin a tawpah kan inti chhe leh thin. Arsenal lakah bul kan tan tha em em a, mahse goal kan khung saka, 1-0 a nih phah.

“Second half-ah kan khel tha leh em em a, Arsenal an chet buai ve lai takin goal kan khung sak leh bawk. Goal li kan khunga, 2-2 in kan inhnehtawkpui a ni ber. Vawiin ang game-ah pawh, kan khelh that ve pawhin a tawpah kan intichhe zel a, chance awlsam tak tak kan hlaha, a chang leh defence lamah kan tisuala, mahse kan rilru put hmang a dik a, kan khel tha thawkhat chuan ka hria,” a ti.

Mourinho hian a player-te sawisel lo mahse a sawi tum chu a player-te a duhkhawp loh zia pawh a ang hle a, mahse  a sawi tum chu amah chiahin a hre awm e. Tun hnaiah United an khel tha lova, hma an sawn hleithei lo. United hotute lam rilru a hriat theih loh na in, hetiang reng a nih chuan Mourinho hi hun an pek rei a rinawm tawh lova, bazar hun vawi khat an nghah sak leh chuan Mourinho hi a vannei hle tura ngaih a ni.

Copyright © inkhel.com 2024. All rights reserved.