15 Mar 2019 09:59

inkhel

Arsenal kawng zawh a hautak dawn

Arsenal chuan Europa League quarter final-ah hmabak hautak zet mai an nei a, Napoli nen an inhmachhawn dawn a. Chelsea chu tlemin an kawng a awlsam deuh a, Slavia Prague nen an inkhel dawn a ni.

Europa League quarter final dangah Spanish club pahnih inhmachhawn tur an awm a, La Liga club ve ve Villareal leh Valencia te chu an inkhel ang a, Benfica chu Eintracht Frankfurt nen an inkhel dawn bawk a ni.

Sevilla a enkawl laiin tuna Arsenal manager Unai Emery chu a che tha thei hle a, Spanish club chu a zawnin vawi thum ngawt mai Europa League title hi a lakpui thei a. Arsenal a enkawl hnuah a thiam thil hi a lantir leh thei dawn nge dawn lo sawi theih a la ni lo a, hnuhma lo nei tha tawh viau mahse Napoli chu a duh aiin an hmachhawn hma ngeiin a rinawm.

2018 khan Arsenal chuan Europa League semi final an thleng thei a, kuminah chuan a aia sang zawk thlen theih ngei an tum hle a. Hetih rual hian Serie A club Napoli pawhin London club hmachhawn chu an chak vak bikin a rinawm lo a, first leg chu Emirates Stadium-a khelh tur a ni dawn a, theihtawp chhuah ngei a ngai dawn a ni.

Arsenal hi Napoli nen inelna lianah vawi hnih chiah an la inhmachhawn a, 2013-14 Champions League group stage-a an inkhelh kha an intawn chhun a la ni a. October 1, 2013 khan Emirates Stadium-ah an inkhel a, Arsenal chu 2-0 in an chak a. December 11, 2013 khan San Paolo Stadium-ah an inkhel ve leh a, hetah hian mual neitu Napoli chu 2-0 in an chak ve leh thung a ni.

London khaw club pahnih - Arsenal leh Chelsea te chuan a rualin anmahni khelmualah first leg hi an khelh rual a rem lo a, hei vang hian UEFA chuan a tira an pawh dan chu an thlak danglam hret a, London khawpuia a ruala Europa League quarter final match pahnih awm lo turin an tidanglam a ni.

Maurizio Sarri pawhin Stamford Bridge-a a season hmasa berah hian trophy lak nghal theih a duh hle dawn a, tun season chhungin Europa League bikah phei chuan an la tlawm miah lo a, hei vang hian champion thei turin beiseina an nei sang hle.

Spanish club Valencia chuan last 16-ah Krasnodar an hneh a, an hmelhriat sa em em mai Villarreal chu an hmaah an ding ve leh dawn a. Bundesliga club Eintracht Frankfurt pawhin an kal tluang lai chu chhunzawm zel an tum ngei dawn a, San Siro-ah Inter Milan chu 1-0 in an hneh thei a, hei vang hian an inrintawkna pawh a sang tha viau ang.

Eintracht Frankfurt hian Dinamo Zagreb hnehtu Benfica chu an hmachhawn dawn a, Portuguese club Benfica hian hun pek belh, minute 94 leh minute 105 ah te goal an thun a, heng goal hmang hian aggregate-ah 3-1 in an chak thei hram a ni.

Semi final-ah hian an kal tluang zel a nih chuan Premier League club pahnihte chu an intawng thei dawn lo a, an chak chhoh theih ve ve chuan final-ah chiah an inhmachhawn thei ang.

April 11 hian quarter final first leg chu an khel dawn a, second leg chu April 18 ah an khel ang a. May 2 ah semi final first leg an khel ang a, May 9 ah second leg chu an khel leh ang a, May 29 khian Baku-ah final chu an khel ang.

Quarter final:

Arsenal vs Napoli

Villarreal vs Valencia

Benfica vs Eintracht Frankfurt

Slavia Prague vs Chelsea

Semi final:

Arsenal/Napoli vs Villarreal/Valencia

Benfica/Eintracht Frankfurt vs Slavia Prague/Chelsea