Gabon striker Pierre-Emerick Aubameyang chuan Borussia Dortmund a chhuahsan dawn nia report a awm a, Arsenal boss Arsene Wenger chuan Aubameyang hi lak a tum ruh hle a, £44.6million laiin Gunners hian lei an tum mek niin Spanish chanchinbumite chuan an tarlang.
Aubameyang hi tun season Bundesliga top scorer ni mekin, goal 18 a khung tling tawh. Europe club lian ten an ngaihven nasa a, Arsenal nen sawi zawm a nih chungchangah 2015 African Player of the Year Aubameyang chuan Arsenal zawm a duh loh thu a sawi chhuak.
Nimin khan Aubameyang hi 2015 African Player of the Year award hlan a ni a, hetah hian Aubameyang chuan,"Arsenal zawm ka duh lo, Dortmund hi chhuahsan leh mai ka tum hrih lo a ni," tiin a sawi. African Player of the Year award a zawna vawi 4 lo la tawh Manchester City midfielder Yaya Toure chu vote 7-in Aubameyang hian a khum a ni.
Aubameyang chuan,"Gabon mipuite chungah lawmthu ka sawi a ni. Ram tana ka khelhpuite leh Dortmund-a ka khelhpuite chungah ka lawm em em a, an thawhrah sengin goal ka khung thin a ni. Africa-a nu leh pate khan in fate suangtuahna tihhlawhtlinsak turin kan ngen bawk che u a ni," tiin award a dawn zawhah a sawi a ni.
pictures credit : Getty