Arsenal chuan nipui bazar hunah an midfield thawm that an tuma, an midfield thawm that nan hian Valencia atangin midfielder Carlos Soler chu lak luh an tum dawn tih Sky Sports chuan a tarlang.

Arsenal manager Mikel Arteta chuan a hnampui ngei mai nipuiah hian lak luh a duh nia sawi niin, Spaniard midfielder kum 23 mi Soler chuan a mit a la hle niin a lang.

Soler hi kum 23 mi chauh ni mahse Valencia player pawimawh a ni chho der tawha, tawnhriat pawh ngah tawhin Arsenal pawh pan se buai lo tura ngaih a ni.

Spain U21 player hlui Soler hi la naupang viau e ti lo chuan La Liga game 105 lai a khel tawha, Champions League game 11 khel tawh bawkin goal 17 a khung tawh.

Soler hi Valencia chhulchhuak liau liau a ni a, kum 2005 atang khan Valencia academy-ah awm tawhin kum khat Valencia B-a a khelh hnuah senior team-ah kum 2016 atang khan a awm tana, Spain U19 leh U21 tan te pawh a lo khel tawh thin.

Soler hian nikum December thla mai khan Valencia-ah contrat thar a ziaka, a contract hian kum 2023 thleng a daih avangin Arsenal hian an lei duh a nih chuan a tlawm dawn hauh lova, season khailak avangin sum lamah club-te’n harsatna an tawk bawk nen, Valencia hian an midfielder hi an chhiar to viau a rinawm a ni.