Arsenal chuan season tawpa transfer window inhawn hunah an beisei aia tam player leina an nei maithei a, tun hnaiah Arsenal neitupa Stan Kroenke club dang pahnihte an chet fuh avangin sum hi a theh chhuah nual theih hmel hle.
Billionaire Stan Kroenke chuan ama sum senga an siam Pepsi Center sakna vel senso £138 million chu a pe tla tawh a, helai hmunah hian ama NBA leh NHL team te chuan an khel thin a. Kroenke team Denver Nuggets leh Colorado Avalanche te chuan playoff an khel thei ve ve a, anmahni hmuna an khelh apiangin pawisa an hai lut teuh thei zel dawn a ni.
Stan Kroenke hian 1999 a Denver stadium an hawn atang khan season khatah £11.5 million a rul chho ngar ngar a. Tunah chuan a pawisa rulh tur chu a rul zo tawh a, hlawkna a tel chho ve thei tan tawh ang.
Kroenke hian a hma chuan transfer window inhawn hunah Unai Emery chu player leina turin £40 million vel chauh a pe dawn niin an sawi a. Season tharah UEFA Champions League khel thei tura an dinhmun an siam a nih pawhin transfer sum hi £60 million vel bak a pe thei dawn lo niin an sawi bawk a ni.
A hausakna £6.7 billion vel zet ni mek Kroenke hi England lam aiin US lamah a che fuh chho rih a, team pahnihin playoff an khelh tur hi best-of-seven series ve ve niin, Denver Nuggets leh Colorado Avalanche te hi an champion ve ve a nih phei chuan an seeding vangin an pahnih hian home game 28 vel zet an khel thei dawn a. Heng game 28 atang hian sum an hai luh tur chu a tlem vak dawn lo tih a chiang hle.
Forbes in an chhut dan chuan Pepsi Center-ah game 10 an khelh pawhin kum 71-a upa Stan Kroenke chuan advertising, merchandise leh concession vel tel miah loin £11.5 million zet chu a hui thei dawn a ni.
American billionaire club dang pakhat, NFL team, Los Angeles Rams chuan season an hmang tha hle bawk a, Super Bowl final an lut a, February thlaah khan New England Patriots chu an hneh ta lo hlauh zawk a ni.
Arsenal boss Unai Emery chuan Premier League title beisei thei tur chuan player a siksawi nual a ngai dawn a. Manchester City leh Liverpool te elpui thei tur chuan player leina tur sum a mamawh hnem ngei a rinawm a, tuna pek tura an ruahman ang zat chuan ram ropui a thlenpui vak a rinawm lo hle.
Spaniard coach hian Juventus lam pan tur Aaron Ramsey hmun ruak luahtu tur a zawn vat a ngai dawn a. Hei bakah hian tlar hnung phui lo tak tiphuisui turin player thar lei belh ngei a ngai dawn bawk a ni.
Arsenal tantute’n ‘Silent Stan’ tia a hming lem an vuah, Stan Kroenke chuan North London velah ngaihsan a hlawh rih lo hle a, hetiang a nih avang hian leiba a rul zo tawh bawk nen, club tantute tihlawm nan transfer sum tam zawk a phawrh mai te pawh a rinawm hle a ni.
Stan Kroenke club neihte:
Arsenal (Premier League)
LA Rams (NFL)
Denver Nuggets (NBA)
Colorado Avalanche (NHL)
Colorado Rapids (MLS)
Colorado Mammoth (NLL)