15 Sep 2020 04:40

inkhel

Arsenal-in Torreira lei dilna an pawm

Arsenal chuan Torino-in Lucas Torreira lei an dilna an pawm niin an sawi a, Gunners hian Uruguay midfielder hi £22 million a hralh an remti niin an sawi.

Nipui transfer inhawn chhungin Arsenal chuan player lak thar an duh a, coronavirus vanga an sum dinhmun a tlakhniam avangin player leina tur sum tuak nan hian an player neih sa hralh then an tum phah a ni.

Lucas Torreira chu sum tuakna atana hralh an rilruk zingah hian a tel a, Serie A club Torino chuan Uruguay midfielder hi Premier League club hnenah hian lei an dil a, club pahnihte hi an inrem dawn hnai niin an sawi mek a ni.

Torreira hian 2018 nipui lai khan Italian club Sampdoria chhuahsanin Emirates Stadium lam hi a pan a. English club hian Torreira hi £26 million vel bawrin an lei a, Arsenal-ah hian bul a tan tha hle a ni.

Emirates Stadium a luhchilh hnuah hian Torreira chuan Arsenal tan game 63 a khel tawh a, London khawpuia season hnih a awm chhung hian goal 3 chu a thun ve tawh a. Tun hnaiah beisei angin a che fuh chiah lo a, hei vang hian Mikel Arteta chuan bul a tantir khat hle a ni.

Mikel Arteta chuan midfield-ah Torreira ai hian Matteo Guendouzi chu a chhawr nasa zawk a. Guendouzi leh Arteta te inkar boruak a fuh vak loh hnuah Granit Xhaka chuan bul a tan chho ve leh tan a. Real Madrid atanga Arsenal-in an hawh Dani Ceballos pawh a che tha chho viau bawk a ni.

Khelmualah hmun a chan tam theih tak loh em avangin Lucas Torreira chuan Arsenal-ah chuan a tan awm zui zel chi ni loin a hre tan a. Kum 24-a upa midfielder a khelh tam theihna turin club dang pan mai hi a hreh loh phah a. Hetiang boruak a awm takah chuan Sampdoria leh Torino te chuan thawm an nei zui vat a ni.

Arsenal hian a hma lawkin Argentine goalkeeper Emiliano Martinez chu Aston Villa hnenah £20 million in an hralh tawh a, £22 million a Lucas Torreira an hralh leh a nih chuan Atletico Madrid atanga lak an tum em em, Thomas Partey chu £50 million in an lak theih tawh ngei a rinawm.