Arsenal chuan an midfielder Lucas Torreira chu duhtu awm mahse hralh chhuah an tum lo hle niin Sky Italia chuan a tarlang.

Sky Italia tarlan danin Italian club AC Milan chuan Torreira hi Italy lama hruai kir leh an tum a, mahse Arsenal chuan AC Milan hi an hnawl dawn.

Uruguayan midfielder Torreira hian Sampdoria atangin nikum nipui lai khan Gunners hi a zawma, a manah London club hian pound maktaduai 26 an seng.

AC Milan chuan an manager Gennaro Gattuso banin, tuna Sampdoria manager Marco Giampaolo chu an la dawn nia sawi a ni a, Giampaolo hian Sampdoria lama a lo enkawl tawh Torreira chu San Siro lama hruai luh a tum niin a lang.

AC Milan chuan Torreira hi an lei chhuak thei lo a nih chuan Sassuolo midfielder Stefano Sensi-a lam an hawi dawn niin Sky Italia hian a ziak bawk.

Kum 23 mi hian a season khatnaah Arsenal tan Premier League game 34 a khel a, Unai Emery-a’n a hmang rim thawkhat viau a, cup game dangah vawi 16 a inlan bawk a ni.

Naupang te a nihin Uruguay atangin Torreira hi Italy-ah a pem a, Pescara-ah awm phawtin, Sampdoria chuan pound maktaduai khat vel chauhin kum 2016 khan an lei a ni.