15 Apr 2019 11:09

inkhel

Arsenal-in Toby Alderweireld an beisei

Arsenal chuan tun hnaiah Tottenham leh Belgium defender Toby Alderweireld chu an beisei deuh niin an sawi a, Manchester United pawhin an lo thlithlai reng bawk a ni.

Tottenham Hotspur chuan 2015 khan Atletico Madrid atangin Toby Alderweireld chu an lei a, Anfield lama a luh hnuah hma a sawn nasa hle a, tunah phei chuan Premier League huang chhunga centre-back tha berte zinga mi a ni tawh a ni.

Belgian defender hi Red Devils chuan season hnih chhung chu an lo enthla tawh a, kuminah khan an la lut teuh hle nghe nghe a. Mahse, United chuan Spurs chu an defender chhuanvawr hralh turin an thlem fuh thei ta lo.

Toby Alderweireld hian tun nipuiah hian a contract neih chu a hmang zo tawh dawn a, United chuan £50 million vel bawr an lo tawktarh ve mek bawk a. Mauricio Pochettino pawlte chuan contract thar ziahpui dan an ngaihtuah mek thung a, a contract chu kum khat chhung pawhsei phawt a, 2020 thleng la chelh theih an duh a, hei hi an ti thei a nih chuan tun nipui hunah £26 million release clause chu an tinung tel dawn niin an sawi.

Spurs hian Toby hi contract sei tak ziahpui an tum hmel loh a, hei vang hian release clause ang zat vel hian club dangin an lak mai a rinawm tawh hle a. Manchester United chuan Belgian defender hi an la hmutai reng a, hei vang hian Old Trafford lama seng luh theih chu an tum leh vat a rinawm hle.

Alderweireld hian contract a ziah belh ta lo a nih chuan Manchester United chauh lo pawhin lak an lo rilruk ve ngei dawn niin a lang a. He defender beisei tum zingah Spurs hmelma club Arsenal chu an langsar thar hle a ni.

Arsenal chu tun season chhungin Premier League club lian paruk zinga goal chhuah hnem ber an ni a, hei vang hian Unai Emery chuan nipui transfer window inhawn hunah defender tha lak luh ngei chu a tum lian hle dawn a ni.

Gunners hian nikum nipui lai khan Borussia Dortmund atangin Greek defender Sokratis Papastathopolous chu an la lut a, an ti fuh angreng hle a. Hetih lai hian Shkodran Mustafi chuan season a hmang tha lo viau a, tihsual a nei chho fo mai a, innghah tak takna tur chuan ngaih a ngam chiah si lo. Captain Laurent Koscielny chuan kumin September thla hian kum 34 a tling ve tawh dawn a, hei vang hian a hma anga chhawr vak chi a ni tawh dawn lo bawk a ni.

An tlar hnung lam thawm that a ngaih em avangin Emery pawhin ngaihpawimawh hmasakah a neih a ngai dawn chiang a. Emery chuan nipui transfer window inhawn hunah player leina tur hian £40 million vel chauh a nei thei dawn a, hei vang hian pawisa hman thiam viau a ngai dawn a ni.

Chelsea leh Manchester City te pawhin kum 30-a upa Toby hi an hmutai ve tho niin an sawi a, mahse Spurs chuan contract thar ziahpui dan an la ngaihtuah ve reng tho a. Heti chung hian release clause hre reng chunga club thenkhatin hma an la a nih chuan Spurs tan hian dan beh theih a ni dawn lo thung a ni.

Club inhal pahnih Tottenham leh Arsenal te’n player an inleitir hnuhnun ber chu 2001 khan a ni a, Tottenham Hotspur defender Sol Campbell chuan Arsenal a zawm a, Gunners tana player langsar tak a ni chho thei a ni.