Laurent Koscielny chuan Arsenal pre-season tour neih turah a kal ve duh loh thu a sawi a, club lampang chuan hrem ngei an tum hmel hle.

Arsenal chuan pre-season tour nei turin United States an pan dawn a, player dang zawng an kal lai hian captain ber Laurent Koscielny chu a kal ve loh tur thu hi a sawi a, London Colney lamah inlanin amaha training lo neih a tum thu a sawi a ni.

Koscielny hian Emirates Stadium chhuahsan a duh a, nipui transfer window inhawn chhung ngei hian France ram lama kal theih a duh a. French defender tawn hriat ngah tak mai hi Ligue 1 club Bordeaux chuan an ngaihven hle a, amah pawh hian a khelhna club thlak hi a duh tawh a. Arsenal hian chhuah an phalsak theih nan na deuh taka nawr a tum hle.

Hetiang boruak a awm chhoh takah chuan Arsenal club thuneitute pawh chanchin kimchang an hrilh vek tawh a. Kum 33-a upa Koscielny hian club thuneitute chu free transfer-a chhuahtir tura a duh thu sawiin, hei hi Gunners chuan an remtih a rinawm lo thung.

Gunners centre-back rinrawl Koscielny hian Emirates Stadium-ah kum khat chhung chu contract a la nei a, a dinhmun azirin kum khat dang pawhsei theih turin thu an dah nghe nghe a. Contract a la neih mek chu Arsenal hian zah hram hram tura an beisei thu sawiin, chutianga awm tur chuan amah pawh an beisei tih an sawi bawk.

Tun dinhmunah chuan Koscielny lei diltu an la awm lo a, hetiang hi a awm a nih chuan Arsenal hian rilru tharin an ngaihtuah ngei a ngai dawn a. Chhuah a duh laia club lamin chelh zui zel an tum avang hian Koscielny chu a thinrim a, kum 9 a lo awm tawhna hmun chhuahsan dan kawng hi a dap kual ta a ni.

Arsenal chuan thu chhuah an siam zui vat a, “Laurent Koscielny awm danah hian kan lungawi lo hle a, club thupek a zawm duh lo a, inkaihhruaina a bawhchhe chiang hle a. Hei chungchang hi rang taka chin fel kan inbeisei a, tunah rih chuan eng vak mah kan sawi chhuak tawh rih lo ang,” an ti.

United States-ah hian Arsenal chuan game 4 an khel dawn a. A hmasa berah Colorado Rapids nen an inkhel ang a, hemi hnuah hian International Champions Cup an khel zui ang a, Bayern Munich, Fiorentina leh Real Madrid te nen an inkhel ang a, hemi hnuah hian Emirates Stadium-ah an kir leh ang.

Club leh Koscielny te chu London Colney-ah an inbe chho tura ngaih a ni a, inrem theih dan an ngaihtuah dawn a ni.