Premier League club Arsenal chuan coronavirus vangin season khailak mek mahse, season chu khelh zawh ngei nise an tih thu an tarlang.

Nimin lam khan Ligue 1 leh La Liga lam te pawhin an lo tih tawh angin Premier League chu tiam chin awm lova suspend a ni a, engtikah nge season kal lai mek hi chhunzawm a nih theih dawn a hriat loh hle.

Sawi a tam a, season hi eng mah lova chan tir a ngai dawn anga sawi te pawh awmin, season chu tihtawp hmaa, Liverpool champion tir mai te pawh sawi a awm nasa hle a, mahse tunah rih chuan season hi khelh zawh hram tum mek a ni.

Nimin khan Premier League club 20-te chuan video-conference an neia, hetah hian season chu tiam chin awm lova suspend rih mai an rela, season tihtawp chu an la tum rih lo hle.

London club Arsenal chuan thuchhuah siamin, “2019-20 season-a domestic league leh cup game zawng zawng khelh hmabak te khelh zawh tum hi kan thlawp em em a, heng competition te hlutna chawinun zel nan hian khelh zawh ngei hi a tulin kan hria.

“Sawrkar leh mithiam zawk te’n a him an tih hun chauha season kalpui leh tum pawh hi kan thlawp hle a, season chhunzawm theih hun tur hi COVID-19 darh zel dan dinhmun nen buk tawn reng a ni,” an ti.