Premier League club dangin Arsenal goalkeeper Aaron Ramsdale chu dawr mah se, Arsenal hian an keeper hi tun season-a chhuah tir an tum loh avangin amah dawrtu hi an lo hnar tih Football.London chuan a tarlang.

English shot stopper hian Arsenal-ah hmun chang mumal tawh lo mah se, Gunners hian January thla-a chhuah tir tumna an nei lova, hemi avang hian midangin an dawr leh a nih pawhin lo hnar zel an tum nia sawi a ni.

Ramsdale dawrtu club hming hi tarlan a ni lova, mahse Premier League table-a 10-na hnuai lama awm mek a nih thu erawh tarlan a ni a, Ramsdale hi tun season laklawhah Arsenal atanga a chhuah a rinawm loh.

Kum 25 mi hi David Raya chuan a nek chhuak a, tunah hian Raya thachhangdawltu a ni. Ramsdale hian a dinhmuna a lungawi loh thu leh hrehawm a tih thu a lo sawi chhuak tawh a, Arsenal hi a chhuahsan hreh lo tih a chiang a, mahse a chhuak duh a nih chuan nakkum nipui bazar inhawn hun a nghah a ngai dawn niin a lang.

Inrinni liamta khan Ramsdale hian Brentford lakah inkhel bul a tan a, mahse hei hi Raya-a’n a club Brentford a hmachhawn theih loh vang chauh niin a lang a, Arsenal hian Raya hi nipui lai khan Brentford atang hian loan-in an lalut.

Brentford laka si ban a nghah hi, Ramsdale-a’n September thla hnua inkhel bul a tan leh vawi khatna a ni a, Arsenal hian Raya hi an lei nghet dawn bawk nen Ramsdale-a tan Arsenal-ah hian first choice keeper nihna chance a chhe tawh viau a ni.